عێراق 130 بەندکراو ڕادەستی ئێران دەکاتەوە

ئاڤا نیوز

جێگری وەزیری دادی ئێران ڕایدەگەیێنێت دانوستانیان لەگەڵ بەرپرسانی عێراق و مالیزیا هەیە بۆ گواستنەوەی 130 بەندکراوی ئێرانی لە عێراق و 85 بەندکراوی دیکە لە مالیزیاوە بۆ ئێران.

 

وێنە گەورەکە: ئێران لەگەڵ عێراق و ژمارەیەک وڵاتی دیکە ڕێککەوتننامەی ئاڵوگۆڕی بەندکراوان و حکومدراوانی واژۆ کردووە، تاوەکو ئێستاش چەندین بەندکراوی لە وڵاتان وەرگرتووەتەوە.

 

لێدوانی فەرمی: عەسکەر جەلالیان، جێگری وەزیری دادی ئێران بە ئاژانسی هەواڵی مێهری ڕاگەیاند، وەزارەتی داد هەوڵی بەردەوام دەدات بۆ گواستنەوەی هاووڵاتییانی ئێرانی کە لە هەر شوێنێکی جیهان بەند کراون بۆ ناو وڵات بە ئەنجامدانی دانوستانی پێویست.

 

-لەم دواییانەدا بە هاوکاری وەزارەتی دەرەوە پەیوەندیمان لەگەڵ قەتەر کرد و توانیمان 10 بەندکراوی ئێرانی ئازاد بکەین کە زیاتر لە 20 ساڵ لە زیندانەکانی قەتەر بوون، پێنج لەو بەندکراوانە گەڕاونەتەوە، لەم هەفتەیە پێنج بەندکراوەکەی دیکەش دەگەڕێنەوە.

- لەم دواییانەدا دانوستانمان لەگەڵ دەسەڵاتدارانی عێراق و مالیزیا ئەنجامدا، ڕەزامەندی ئەوانمان وەرگرت بۆ گواستنەوەی 130 بەندکراوی ئێرانی لە عێراق و 85ی دیکە لە مالیزیا بۆ ئێران، ئەمەش بەم زووانە جێبەجێ دەکرێت.