مەشهەدانی: ترەمپ لەبارەی گرووپە چەکدارەکانەوە هۆشداری بە سوودانی داوە

ئاڤا نیوز

سەرۆکی ئەنجوومەنی نوێنەرانی عێراق ڕایدەگەیێنێت سەرۆکی هەڵبژێردراوی ئەمریکا، لەبارەی گرووپە چەکدارەکانەوە هۆشداریی بە سەرۆکوەزیرانی عێراق داوە و ئاماژە بۆ ئەوەش دەکات گوشارەکانی ئەمریکا بووە هۆکاری وەستانی نیازی ئیسرائیل بۆ هێرشکردنە سەر عێراق.

 

چیرۆکی سەرەکی: مەحموود مەشهەدانی، سەرۆکی ئەنجوومەنی نوێنەرانی عێراق لە چاوپێکەوتنێکیدا لەگەڵ کەناڵی "عەرەبییە" تیشکی خستە سەر چەند پرسێکی تایبەت بە دۆخی عێراق و سووریا و ناوچەکە.

 

لێدوانی فەرمی: مەشهەدانی پەیوەست بە هەڵبژاردنی پەرلەمانی عێراق ڕایگەیاند: هەر کاتێک یاسای هەڵبژاردن پەسند کرا، هەڵبژاردنی پەرلەمانی عێراق لە کاتی خۆیدا ئەنجام دەدرێت. بەڵام ئەگەر بێت و بارێکی نائاسایی بێتە پێشەوە ڕەنگە هەڵبژاردن دوابخرێت.

 

- خراپبوونی ئاسایشی سووریا کاریگەریی نەرێنی لەسەر ناوچەکە دەبێت و ئەوەی لە سووریا ڕوودەدات کاریگەری لەسەر عێراق هەیە.

 

- گوشارەکانی ئەمریکا بووە هۆکاری وەستانی نیازی ئیسرائیل بۆ هێرشکردنە سەر عێراق و سەرۆکی هەڵبژێردراوی ئەمەریکا دۆناڵد ترەمپ بە سوودانی ڕاگەیاندووە، پێویستە چەک تەنیا لە دەستی دەوڵەتدا بێت.

 

- گرووپە چەکدارەکان وەڵامی داخوازییەکانیان دایەوە بۆ ڕاگرتنی هێرشەکانیان بۆ سەر ئیسرائیل، هەڕەشەکانی ئیسرائیل بۆ لێدان لە عێراق هێشتا مایەی نیگەرانین.