بانکی ناوەندی 30% فرۆشتنی دۆلارى نەختینەیی کەمدەکاتەوە

ئاڤا نیوز

 

بانکی ناوەندی عێراق بۆ ئەمڕۆ و بەیانی فرۆشتنی دۆلارى نەختینەیی بەڕێژەی 30% کەمدەکاتەوە، بەڵام فرۆشتنی دۆلار بە گەشتیاران بەردەوام دەبێت.

 

ڕاگەیێنراوی فەرمی: بەگوێرەی نوسراوێکی بانکی ناوەندی عێراق کە ئاراستەی بانک و کۆمپانیاکانى ئاڵۆگۆڕى دراو کراوە، ئاماژە بەوەکراوە، داواکاریی بانکەکان بۆ دەستەبەرکردنى نەختینەی دۆلارى بۆ گەشتیاران لە ڕۆژانی 30 و 31ی ئەم مانگە لەڕێگەی پەنجەرەی ئەلیکترۆنییەوە وەردەگرێت، بەڵام دەبێت داواکاریی کڕینی دۆلار 50% کەمتر نەبێت لەو پارەیەی پێشتر ئەو بانک و کۆمپانیایانە لەڕێگەی پەنجەرەی ئەلیکترۆنییەوە وەریانگرتووە، لەبری 80% کە پێشتر وەک مەرج دیاریکرابوو.

 

زانیاریی زیاتر: نوسراوەکەی بانکی ناوەندی مانای وایە داواکاریی بانکەکان و کۆمپانیاکانى ئاڵوگۆڕى دراو بۆ وەرگرتنی دۆلار لەوانەیە تەنیا 50%یان وەربگیرێن، بەوپێیەش بانکی ناوەندی فرۆشتنی دۆلار بەشێوەی نەختینەیی 30% کەمکردووەتەوە، بەڵام وەک لە نوسراوەکەدا هاتووە ئەم ڕێکارە تەنیا بۆ دوو ڕۆژە.

 

لەلایەکی دیکەوە: سەرچاوەیەک لە بانکی ناوەندی عێراق بە ئاڤا میدیای ڕاگەیاند، لە ڕۆژی 2ـی مانگی داهاتووەوە بانکی ناوەندی پەنجەرەی ئەلیکترۆنی تایبەت بە فرۆشتنی دۆلار دادەخات، لەمەودوا بانکە عێراقییەکان لە ڕێگەی بانکی نێوەندگیر و بەبێ دەستوەردانی بانکی ناوەندی پارەی کاڵاکانیان ڕەوانەی دەرەوە دەکەن.