سوودانی ساڵی 2025 بە ساڵی "بەردەوامی دەستکەوتەکان" ناودەنێت

ئاڤا نیوز

 

 

سەرۆکوەزیرانی عێراق دەڵێت، ساڵی 2025 ساڵی "بەردەوامی دەستکەوتەکان" دەبێت و کارکردن لە پڕۆژە خزمەتگوزاریی و ستراتیژییەکان بەردەوام دەبێت، جەختیش لە چاکسازیی و بەرەنگاربوونەوەی گەندەڵی دەکاتەوە.

 

ئەوەی پێویستە بیزانیت: پێشتر سەرۆکوەزیرانی عێراق ساڵی 2024ی بە ساڵی "دەستکەوتەکان" ناوبردبوو و داوایکردبوو کە عێراقییەکان جگە لە دەنگی ئامێرەکان کە لەسەر پرۆژەکان کاردەکەن، گوێیان لەهیچ دەنگێکی دیکە نەبێت، حکومەت دەڵێت لەو ساڵەدا 427 پڕۆژەی خزمەتگوزاری، ڕێگاوبان و ژێرخانی تەواوکردووە و خراوەتە خزمەتی هاووڵاتیانەوە.

 

ڕاگەیێنراوی فەرمی: محەممەد شیاع سوودانی، سەرۆکوەزیرانی عێراق لە پەیامێکدا کە بە بۆنەی ساڵی نوێ بڵاویکردووەتەوە، ئەوەی خستووەتەڕوو کە ساڵی ڕابردوو هەموو هەوڵێکیان خستەگەڕ بۆ ئەوەی پڕۆژەی فراوان لە بواری گەشەپێدانی بەردەوام ئەنجام بدەن، لە ساڵی نوێشدا لەسەر تەواوکردنی ئەو پرۆژانە بەردەوام دەبن کە دەستیان پێکردووە.

 

سەرۆکوەزیران ساڵی 2025یشی بە ساڵی "بەردەوامی دەستکەوتەکان" ناوبردووە و ئاماژەی بەوەشکردووە، هیچ دەرفەتێک لەدەستنادەن بۆ خزمەتکردنی عێراقییەکان، ئەویش لە ڕێگەی بوونیادنانەوەی دەوڵەت، ڕووبەڕووبوونەوەی گەندەڵی، چاکسازی، ڕەخساندنی هەلیکار، دابینکردنی بیمەی چاودێریی کۆمەڵایەتی و تەندروستی.