ئێف بی ئای: ڕووداوەکەی ئۆرلینز وەک کردەوەیەکی 'تیرۆرست'ـی کاری لەسەر دەکرێت

ئاڤا نیوز

 

دوای ڕووداوەکەی نیو ئۆرلینز لە ئەمریکا کە تیایدا بارهەڵگرێک خۆی کرد بە نێو کۆبوونەوەیەکی خەڵکدا و ژمارەیەک کەس بەهۆیەوە گیانیان لەدەستدا، ئێستا ئێف بی ئای دەڵێت، "ڕووداوەکە وەک کردەوەیەکی تیرۆرستی کاری لەسەر دەکرێت".

 

چیرۆکی سەرەکی: بارهەڵگرێک لە شەقامی بۆڕبۆن لە شاری نیوئۆرلیانزی ئەمریکا خۆی دەکات بەناو کۆبوونەوەیەکی جەماوەریی کە بۆ ساڵی نوێ ڕێکخرابوو، لە ئاکامدا 10 کەس گیانیان لەدەستدا و نزیکەی 30 کەس بریندار بوون.

 

ئەوەی لە بارەیەوە دەگوترێت: بەپێی گوتەی پۆلیس و شایەتحاڵەکانی ناوچەکە، شۆفێری بارهەڵگرەکە دوای ڕووداوەکە لە ئۆتۆمبێل دابەزیوە و دەستی بە تەقەکردن کردووە، لەو کاتەدا پۆلیس هەوڵی داوە ڕێگری لێبکات، بەوهۆیەوە لەو ڕووبەڕووبوونەوەیەدا دوو پۆلیس برینداربوون و شۆفێری بارهەڵگرەکەش کوژرا.

 
لێدوانی فەرمی: ئان کیرکپاتریک، بەرپرسی پۆلیسی ناوچەکە بە ڕۆژنامەنووسانی ڕاگەیاند، شۆفێرەکە هەوڵی داوە کۆمەڵکوژی بکات کاتێک پۆلی ویستوویەتی ڕێگری لێ بکات، تەقەی کردووە و دوو ئەفسەری پۆلیس برینداربوون.

 

لەلایەکی دیکەوە: ئێف بی ئای ئەمریکی ڕایگەیاند، لە شوێنی ڕووداوەکە ئامێرێکی تەقینەوەیان دۆزیوەتەوە و لێکۆلینەوە لە ڕووداوەکە بەردەوامە.

 

کاردانەوەکان: جۆ بایدن، سەرۆکی ئەمریکا پەیوەندی بە لاتۆیا کانترێل سەرۆکی شارەوانی نیو ئۆرلینزەوە کرد بۆ ئەوەی "پشتیوانییەکی تەواوی فیدراڵی" پێشکەش بکات.

 

ئەمەش بزانە: بایدن لەلایەن بەرپرسانی ئێف بی ئای و ئاسایشی ناوخۆوە ئاگادارکراونەتەوە سەبارەت بەو هێرشەی کە کۆشکی سپی بە هێرشێکی "ترسناک" ناوی بردووە.