جۆرە ماسییەک مەترسی لەسەر ژینگە و سامانی ماسی لە عێراق دروست دەکات

ئاڤا نیوز

 

جۆرە ماسییەک لە ڕووبار و دەریاچەکانی عێراق بەشێوەیەکی بەرچاوو زیادی کردووە و وەزارەتی کشتوکاڵی عێراق دەڵێت، "کاریگەریی خراپی لەسەر ژینگە و سامانی ماسیی وڵاتەکە دەبێت".

 

وێنە گەورەکە: ماسییەکە ناوی ڕاستەقینەی تیلاپیایە و بە 'شانە' ناسراوە، یەکێک لە تایبەتمەندییەکانی ئەوەیە زوو زیاد دەکات و لە ژینگە سەختەکاندا توانای ژیانی هەیە و ماوەیەکە ژمارەیان بە شێوی بەرچاو لە ئاوەکانی عێراق زیادیکردووە بە گوێرەی وەزارەتی کشتوکاڵ بە تایبەتی لە زۆنگاوەکانی باشووری عێراق و پارێزگای زیقار زیاتر بەربڵاون.

 

ڕاگەیێنراوی فەرمی: وەزارەتی کشتوکاڵی عێراق ڕایگەیاند: ماسیی تیلاپیا(شانە) هەڕەشەیەکی گەورەیە بۆ سەر سیستەمی ژینگەیی و ماسییە خۆماڵییەکانی وەکو قاوەیی (بونی)، کارب و شەبووت، هاوکات وەزارەتەکە ڕوونیشیکردووە، هیچ پلانێک لە ئارادا نییە بۆ پاککردنەوەی ڕوووبارەکان و لەناوبردنی ئەو جۆرە ماسییە.

 

کاریگەریی و لێکەوتەکان: ماسی تیلاپیا ماسییە بچووکەکان دەخوات و خاکی ژێر ئاو تێکدەدات لە گەڕان بەدوای خۆراک، دەبێتە هۆی گواستنەوەی نەخۆشی ئەمەش مەترسییە بۆ ماسییەکانی دیکە و هەڕەشەیە بۆ سەر ژینگە، تەنانەت زیانی تەندروستی هەیە و بۆ خواردن، تامیشی وەکو جۆرەکانی دیکەی ماسی خۆش و بەچێژ نییە.