لە دوو قۆڵەوە هێرش کرایەوە سەر بەنداوی تشرین

ئاڤا نیوز

هێرشی گرووپە چەکدارەکانی نزیک لە تورکیا و بە پاڵپشتی سوپای تورکیا لە دوو قۆڵەوە بۆ سەر بەنداوی تشرین لە باشووری ڕۆژهەڵاتی شاری منبج دەستیپێکردەوە.

 

وێنە گەورەکە: لە دوای کۆتاییهاتنی دەسەڵاتی ئەسەد، هێرشی گرووپە چەکدارەکانی نزیک لە تورکیا بۆ سەر باکوور و باشووری ڕۆژهەڵاتی سووریا بەردەوامە و تاوەکو ئێستاش چەندین جار هێرشیان کردووەتە سەر بەنداوی تشرین کە دەکەوێتە ژێر کۆنترۆڵی هەسەدە.

 

ئەوەی ئێستا ڕوودەدات: ئەمڕۆ پێنجشەممە 2-1-2025، جارێکی دیکە لە دوو قۆڵەوە گرووپە چەکدارەکانی نزیک لە تورکیا و بە پاڵپشتی سوپای تورکیا هێرشیان کردەوە سەر بەنداوی تشرین و شەڕ و پێکدادان لەنێوان چەکدارانی ئەنجوومەنی سەربازیی منبج  و گرووپە چەکدارەکان بەردەوامە.

 

ئەوەی پێویستە بیزانیت: هەر لەدەستپێکی ساڵی نوێوە گرژییەکان لە چەند ناوچەیەکی ڕۆژئاوای کوردستان لەنێوان هێزەکانی سووریای دیموکرات و گرووپە چەکدارەکانی نزیک لە تورکیا بەردەوام بوون.

 

ئەمەش بزانە: بەنداوی تشرین دەکەوێتە ناوچەی منبج لە پارێزگای حەلەب، لەسەر ڕووباری فورات دروستکراوە، توانای گلدانەوەی یەک ملیار و 900 ملیۆن مەتر سێجا ئاوی هەیە، 80 کیلۆمەتر لە سنووری تورکیا دوورە.

 

- یەکەم هێرش لە ساڵی نوێیدا، واتە لە 1-1-2025، فڕۆکەیەکی بێ فڕۆکەوانی سەر بە سوپای تورکیا خاڵێکی سەربازی سەر بە هێزەکانی سوریای دیموکراتی لەسەر پردی قەرە قۆزاق لە شارۆچکەی منبج لە ڕۆژهەڵاتی حەلەب بۆردوومان کرد و بەهۆیەوە سێ سەربازی هەسەدە کوژران و ژمارەیەکی دیکەش برینداربوون.

 

- لە تۆڵەی خستنە خوارەوەی فڕۆکەیەکی بێ فڕۆکەوانی تورکیا لە جۆری "بەیرەقدار" لە ئاسمانی پردی قەرە قۆزاق لە باشووری کۆبانێ، ئێوارەی ڕۆژی 1-1-2025، تۆپخانەکانی تورکیا بۆ چەندین کاتژمێر ناوچەکانی دەورووبەری کۆبانێیان تۆپباران کرد.