ئیدارەی نوێی سووریا دەستکاری پرۆگرامەکانی خوێندن دەکات

ئاڤا نیوز

 

ئیدارەی نوێی حکومەتی کاتیی سووریا، گۆڕانکاریی لە پڕۆگرامەکانی خوێندن لە سەرجەم قۆناغەکان دەکات و هەموو ئەو ئاسەوارانە لەنێو پرۆگرامەکان ناهێڵێت کە پەیوەندیان بە دەسەڵاتی بنەماڵەی ئەسەدەوە هەیە.

 

بەڵگە: بەپێی ئەو بەڵگانەی کە وێنەیەکی دەست ئاڤا میدیا کەوتووە، لەلایەن "وەزارەتی پەروەردەی کۆماری عەرەبی سووریا"وە دەرچووە و بۆ سەرجەم ناوەندەکانی خوێندن لە سووریا گشتاندنی بۆ کراوە.

 

قووڵتر: بەپێی گشتاندنەکە، پڕۆگرامەکانی خوێندن لە پۆلەکانی یەکەم تا سێیەمی ناوەندی لە کۆماری عەرەبی سووریا بۆ ساڵی خوێندنی 2025ی زایینی هەموارکردنەوەی بۆ کراوە.

 

ئەوەی پێویستە بیزانیت: لە نێو خشتەکەدا هەموو ئەو وانانە و بەش و لاپەڕانە دیاریکراون کە پێویستە لەنێو پرۆگرامەکانی خوێندن دەربهێنرێن، لەوانە وێنە و ناوی بەشار ئەسەد و بنەماڵەکەی، سروودی نیشتمانی، شۆڕشت هەشتی ئازار، وێنەی کۆلارە، وێنەی پەیکەر و چەند بابەتێکی دیکە کە پەیوەندیان بە سیاسەتەکانی ڕژێمی بەعسەوە هەیە لەنێو پرۆگرامەکاندا.

 

باکگراوند: ڕۆژی 08-12-2024، هێزەكانی ئۆپۆزیسیۆنی سووریا گەیشتنە دیمەشقی پایتەختی ئەو وڵاتە و كەوتنی دەسەڵاتی بەشار ئەسەدیان ڕاگەیاند و دواتر دەستیان بە هەنگاونان بۆ پێکهێنانی حکومەتێکی ڕاگوزەر بە سەرۆکایەتی محەممەد بەشیر سەرۆکی حکومەتی ڕزگاری سووریا کرد.