سوودانی داوای سزادانی ئەنجامدەرانی تاوانی کوشتنی خێزانەکەی ناوچەی سەدر دەکات

ئاڤا نیوز

 

کاردانەوەکان لەسەر کوشتنی ئەندامانی خێزانەکەی ناوچەی سەدر لە بەغدا زیاتر دەبن، سەرۆکوەزیرانی عێراق داوای لێکۆڵینەوەی خێرا و سزادانی ئەنجامدەرانی تاوانەکە دەکات.

 

ڕاگەیەنراوی فەرمی: نوسینگەی ڕۆژنامەوانی سەرۆکوەزیرانی عێراق، لە ڕاگەیەنراوێکدا بڵاویکردەوە، محەممەد شیاع سودانی، سەرۆکوەزیرانی عێراق فەرمانی بە هێزە ئەمنییە تایبەتمەندەکان کردووە، پەلە بکەن لە لێکۆڵینەوەکانیان لەسەر ئەو ڕووداوە و تاوانبارانیش ڕادەستی دادگا بکرێن تاوەکو سزای خۆیان وەربگرن.

 

لێدوانی فەرمی: فورات جاسم زرێجاوی، مامی کوژراوەکان لە شوێنی ڕووداوەکە بە ئاڤا میدیای ڕاگەیاند، داوای لەسێدارەدانی تاوانباران دەکەین و بەهیچ بڕیارێکی دیکە ڕازی نابین، ئەوانەی ئەم تاوانەیان ئەنجامداوە دەبێت بەکارهێنەری ماددەی هۆشبەربن و پێشینەی تاوانیان هەبێت، چونکە هەر مرۆڤێک بەهۆشبێت و خاوەن ویژدانبێت دەستی ناچێتە کوشتنی ژنی دوو گیان و منداڵی تەمەن دوو ساڵ.

 

زانیاریی زیاتر: لەکاتی ناشتنی تەرمی کوژراوەکان کەسوکاری قوربانییەکان داوایان لە سەرۆکوەزیرانی عێراق کرد بەزوویی بێتە سەرخەت و ئەنجامدەرانی تاوانەکە دەستگیر بکات و هەڕەشەی ئەوەشیانکرد، ئەگەر سەرۆکوەزیران نەیەتە سەرخەت بابەتەکە زیاتر گەورە دەبێت و خۆیان بە عورفی عەشایەری پەنا بۆ تۆڵەکردنەوە دەبەن.

 

باکگراوند: لەم ڕووداوەدا بکوژ و کوژراو کەس و ناسراوی یەکدین و ماوەی زیاتر لە سی ساڵە دراوسێن، ئێوارەی ڕۆژی 30-12-2024  بکوژەکان بانگهێشتی قوربانییەکانیان کرد بۆ ئێوارە خوانێک تاوەکو لەوێ بەشێک لەو قەرزەی لەلایانە بۆیان بگێڕنەوە کەبڕەکەی 60 ملیۆن دینارە، لەئەنجامدا دایکێک و چوار منداڵ دەکوژرێن، بۆ دزینی پارەی زیاتریش بکوژەکان دەچنە ماڵی قوربانییەکان، لەوێش پورەکەیان و دوو منداڵەکەی دەکوژن، لەم ڕووداوەدا تەنیا باوکەکە دەربازی بووە، چونکە لە سامەڕا لە ئەرکدابووە.