نەخۆشخانەی ڕزگاری و فریاکەوتنی ڕۆژهەڵات لە هەولێر نۆژەن دەکرێنەوە

ئاڤا نیوز

 

بە بڕیاری سەرۆکوەزیران مەسرور بارزانی، هەردوو نەخۆشخانەی ڕزگاری و فریاکەوتنی ڕۆژهەڵات لە هەولێر نۆژەن دەکرێنەوە و  ئێستاش قۆناغی یەکەمی پڕۆسەکە تەواو بووە.

وێنە گەورەكە: هەردوو نەخۆشخانەی ڕزگاری و فریاکەوتنی ڕۆژهەڵات بە دوو لە گرنگترین نەخۆشخانەكانی شاری هەولێر دادەنرێن و ڕۆژانە ژمارەیەكی زۆری هاووڵاتیان بۆ وەرگرتنی چارەسەری ڕوویان تێدەكەن، چەند بەشێكی هەردوو نەخۆشخانەكە پێویستیان بە نۆژەنكردنەوە و دابینكردنی ئامێری پزیشكیی سەردەمیانە هەیە.

 

ڕاگەیێنراوی فەرمی: ماڵپەڕی فەرمی حكومەتی هەرێمی كوردستان بڵاویكردووەتەوە، لەپێناو زیاتر خزمەتکردنی هاووڵاتیان، نووسینگەی سەرۆکوەزیرانی هەرێمی کوردستان ڕاستەوخۆ سەرپەرشتیی پڕۆسەی نۆژەنکردنەوەی نەخۆشخانەکان دەکات.

 

قۆناغەكانی جێبەجێكردنی پڕۆژەكە:

قۆناغی یەکەم: سیستمی ساردی و گەرمیی نەخۆشانەکان چاک کراونەتەوە و 400 سپلیتی كۆنیش لابراون، هاوكات هەریەک لە سیستمی هەڵمی، سیستەمی هەواگۆڕکێی پێشکەوتوو و سیستەمی دابینکردنی ئاوی گەرم بۆ نەخۆشخانەکان داندراون.

هەر لە قۆناغی یەکەمدا دوو بیری نوێی ئاو لێدراون و 20 کارمەندی تەندروستییش بۆ بەشی پێشوازیی نەخۆشخانەی فریاکەوتنی ڕۆژهەڵاتی هەولێر دامەزرێندراون.

 

قۆناغی دووەم: كە ئێستا کاری تێدا دەکرێت، سیستمی ریسایکلینی ئاوی نەخۆشخانە دادەندرێت و ئاوەڕۆی نەخۆشخانەکان بە تەواوی نۆژەن دەکرێنەوە و ڕووکاری دەرەوەی هەردوو نەخۆشخانەکەش نوێ دەکرێتەوە.

 

قۆناغی سێیەم: پێکدێت لە درووستکردنی گەورەترین کارگەی ئۆکسجین لە نەخۆشخانەی ڕزگاری، کردنەوەی بەشی نازوور و دانانی 12 ئامێری پێشکەوتووی نازوور و دانانی ئامێر و کەلوپەلی پێویست بۆ بەشەکانی تاقیگە، نەشتەرگەری و تیشک.

هەر لە قۆناغی سێیەم 12 بەرزکەرەوە (ئەسانسۆر)ـی نوێ و سیستەمێکی پێشکەوتووی ئاگرکوژێنەوە بۆ نەخۆشخانەی ڕزگاری دادەندرێن و ناوەوەی نەخۆشخانەکان بە تەواوەتی نۆژەن دەکرێنەوە بە سەرجەم بەش و قاوشە جیاوازەکانەوە.

 

ئەوەی پێویستە بیزانیت: ساڵانە زیاتر لە 13 هەزار نەشتەرگەری لەو نەخۆشخانەیە دەکرێت و پێشوازی لە سەدان هەزار نەخۆش دەکات و دەیان جۆر پشکنین و چارەسەری تەندروستی لەو نەخۆشخانەیە پێشکەش بە هاووڵاتییان دەکرێت.