عەممار حەكیم: درێژكردنەوەی تەمەنی كۆمیسیۆن بۆ هەڵبژاردنی ئایندە پێویستە

ئاڤا نیوز

 

سەرۆكی ڕەوتی حیكمە دووپاتی دەكاتەوە، درێژكردنەوەی تەمەنی كۆمسیۆنی باڵای هەڵبژاردنەكان بۆ ساڵێك، پێویستییەكی هەنووكەییە و قۆناغی ئێستا بواری هەمواركردنەوەی یاسای هەڵبژاردنەكان نادات.

وێنە گەورەكە: ڕێككەوتی 07-01-2025، تەمەنی كۆمیسیۆنی باڵای سەربەخۆی هەڵبژاردنەكان كۆتایی دێت، ئەوەش لە كاتێكدایە ئەمساڵ گرنگترین هەڵبژاردنی پەرلەمانی عێراق بەڕێوە دەچێت و زۆربەی هێز و لایەنە سیاسییەكان كۆكن لەسەر درێژكردنەوەی تەمەنی كۆمیسیۆن بە مەبەستی سەرپەرشتیكردنی هەڵبژاردنەكە.

 

لێدوانی فەرمی: لەمیانی پێشەشكردنی وتارێك لە كۆڕبەندی ڕەوشی مافەكانی مرۆڤ كە لە شاری نەجەف بەڕێوە چوو، عەممار حەكیم ـ سەرۆكی ڕەوتی حیكمە، ڕایگەیاند، دۆخی عێراق لە زۆر ڕووەوە بەرەوپێشچوونی بەخۆیەوە بینیوە، لەگەڵ ئەوەشدا دۆخەكە ڕێگە بە هەمواركردنەوەی یاسای هەڵبژاردنەكان نادات و باشترین چارەسەر ئەوەیە؛ پەرلەمان تەمەنی ئێستای ئەنجوومەنی كۆمیسیاران بۆ ساڵێك درێژ بكاتەوە تا سەرپەرشتی هەڵبژاردنی ئایندەی ئەنجوومەنی نوێنەرانی عێراق بكات.

 

لەلایەكی دیكەوە: ئەحمەد مەجید، ئەندامی ئەنجوومەنی نوێنەرانی عێراق بە میدیا عێراقییەكانی گوتووە، دانیشتنەكەی ڕۆژی یەكشەممەی ئەنجوومەنی نوێنەران بۆ درێژكردنەوەی ماوەی كارەكانی كۆمیسیۆنە تا سەرپەرشتیی هەڵبژاردنی پەرلەمان بكات كە بڕیارە لە مانگی ئۆكتۆبەری ئەمساڵ بەڕێوە بچێت.