تەندروستیی جیهانی: %7 دانیشتووانی غەززە کوژراون یان برینداربوون

ئاڤا نیوز

 

ڕێکخراوی تەندروستی جیهانی بڵاویکردەوە کە 7%ی دانیشتووانی کەرتی غەززە بەهۆی هێرشە بەردەوامەکانی ئیسرائیل کوژراون  یان برینداربوون.

 

وێنە گەورەکە: بەهۆی بەردەوامی هێرشەکانی ئیسرائیل بۆ سەر کەرتی غەززە و بە ئامانجگرتنی نەخۆشخانەکان، سێکتەری تەندروستی تووشی زیانێکی زۆر بووەتەوە، ئەمەش وایکردووە بریندارەکان چارەسەری پێویستیان بۆ نەکرێت و ڕێژەی گیان لەدەستدان لەو کەرتە بەردەوام بەرزبێتەوە.

 

لێدوانی فەرمی: دکتۆر پیپەر کۆرن، نوێنەری ڕێکخراوی تەندروستی جیهانی لە فەڵەستین ڕایگەیاند: لە مانگی ئۆکتۆبەری 2023ـەوە نزیکەی 7% دانیشتووانی کەرتی غەززە کوژراون یان بریندار بوون. بە گوتەی دکتۆر پیپەر زیاتر لە 25%ی ئەوانەی برینداربوون، تووشی برینێک بوون کە کاریگەری لەسەر تەواوی ژیانیان دروستکردووە و پێویستیان بە هاوکاریی هەیە.

 

زانیاریی زیاتر: زیاتر لە 12 هەزار کەس پێویستیان بە گواستنەوە بۆ دەرەوەی غەززە هەیە، بۆ ئەوەی چارەسەری پێویستیان بۆ بکرێت.

 

لەلایەکی دیکەوە: ڤۆڵکەر تورک، کۆمسیاری باڵای مافەکانی مرۆڤ لە نەتەوەیەکگرتووەکان ڕایگەیاند: کارەساتێک بەرامبەر بە مافەکانی مرۆڤ هێشتا لە غەززە بە بەرچاوی جیهانەوە بەردەوامە.