ئیدارەی بایدن کۆتا ڕێککەوتنی چەک لەگەڵ ئیسرائیل واژۆ دەکات

ئاڤا نیوز

 

ئیدارەی جۆ بایدن، سەرۆکی ئەمریکا کۆنگرێسی ئاگادارکردووەتەوە لە ڕێککەوتنێک بۆ فرۆشتنی چەک بە بەهای هەشت ملیار دۆلار بە ئیسرائیل، ئەمەش وەک کۆتا ڕێککەوتنی پێش کۆتایی هاتنی ماوەی سەرۆکایەتییەکەی.

 

زانیاریی بەدەستهاتوو: ماڵپەڕی ئەکسیوس ڕایگەیاند، ئیدارەی بایدن دوایین ڕێککەوتن بۆ فرۆشتنی چەک بە ئیسرائیل بە بڕی هەشت ملیار دۆلار واژۆ دەکات کە پێکدێت لە چەندین مووشەکی پێشکەوتوو و چەندین چەک و تەقەمەنی. بەڵام تا ئێستا ڕەزامەندی ئەنجوومەنی پیران و ئەنجوومەنی نوێنەرانی وەرنەگرتووە.

 

ئەوەی پێویستە بیزانیت: وڵاتانی دیکە ئەمریکا بەوە تۆمەتبار دەکەن کە ئەو چەکانەی بە ئیسرائیل دەفرۆشێت ئەو وڵاتە بۆ کۆمەڵکوژی هاووڵاتییانی کەرتی غەززە بەکاریدەهێنێت بەڵام ئەمریکا ئەو تۆمەتانە ڕەتدەکاتەوە.

 

باکگراوند: ئەمریکا گەورەترین هاوپەیمانی ئیسرائیلە لە شەڕی دژی غەززە بۆ دابینکردنی چەک و تەقەمەنی، بەو پێیەی لە ئۆکتۆبەری 2023ەوە هەزاران تۆن چەک و تەقەمەنی لە ڕێگەی ئاسمانی و دەریاییەوە بۆ دابینکردووە.