داوای لێپرسینەوە لە وەزیری ناوخۆی عێراق دەکرێت

ئاڤا نیوز

 

پەرلەمانتارێک داوای لێپرسینەوە لە وەزیری ناوخۆی عێراق دەکات لەسەر ڕادەستکردنەوەی سەلمان خالیدی، چالاکوانی سیاسیی کوێتی لەلایەن عێراقەوە.

 

وێنە گەورەکە: کاردانەوەکان لەسەر ڕادەستکردنەوەی سەلمان خالیدی، چالاکوانی سیاسیی کوێتی لەلایەن وەزارەتی ناوخۆوە بە دەسەڵاتدارانی کوێت بەردەوامە و لەسەر ئەو کارەش داوایەکی پەرلەمانی کراوە بۆ لێپرسینەوە لە وەزیری ناوخۆی عێراق.

 

نووسراوی فەرمی: بەپێی نووسراوێکی فەرمی کە وێنەیەکی دەست ئاڤا میدیا کەوتووە و واژۆی نیسان زایر، پەرلەمانتاری فراکسیۆنی سادیقون، سەر بە قەیس غەزعەلی، ئەمینداری گشتیی عەسائیب ئەهلی حەقی بەسەرەوەیە و ئاراستەی سەرۆکی پەرلەمانی کردووە، داوا دەکات لێپرسینەوە لە عەبدولئەمیر شەممەری، وەزیری ناوخۆی عێراق بکرێت لەسەر ڕادەستکردنەوەی پەنابەرێکی کوێتی بە دەسەڵاتدارانی کوێت.

 

ئەوەی پێویستە بیزانیت: بە گوێرەی نووسراوەکەی نیسان زایر، ڕادەستکردنەوەی پەنابەرێکی سیاسی بەپێی بڕگەی دوو لە ماددە 21ی دەستوور سەرپێچی یاساو دەستووری عێراقییە کە تێیدا هاتووە: "مافى پەنابەرى سياسى لە عێراقدا بە پێى ياسا ڕێكدەخرێت و  نابێت پەنابەرى سياسى بدرێتە دەست لايەنى بيانى يان بەزۆر بگەڕێنرێتەوە بۆ ئەو وڵاتەى كە بە جێى هێشتووە".

 

شێوازی جێبەجێکردن: پاڵپشت بە واژۆی ژمارەیەک پەرلەمانتار کە هاوپێچی نووسراوەکە کراوە، پەرلەمانتارەکە لەسەر ئەو بنەمایە داوای لە سەرۆکی پەرلەمان کردووە لێپرسینەوە لە وەزیری ناوخۆ بکرێت.