ئاڤا کاندیدانی یەکێتی بۆ پۆستی جێگری سەرۆکوەزیران ئاشکرا دەکات

ئاڤا نیوز

ئەمجارەش پۆستی جێگری سەرۆکوەزیرانی هەرێمی کوردستان بەر یەکێتی دەکەوێت، سێ بەرپرسی باڵای ئەو حیزبەش بۆ وەرگرتنی پۆستەکە کاندیدن.

 

وێنە گەورەکە: هەرچەندە پارتی و یەکێتی لەبارەی پێکهێنانی کابینەی 10 نەگەیشتوونەتە ڕێککەوتنی کۆتایی و لە گفتوگۆ بەردەوامن، بەڵام بەشێک لە پۆستە باڵاکان یەکلابوونەتەوە، بۆنموونە پۆستی سەرۆکوەزیران بۆ پارتی دەبێت و جێگری سەرۆکوەزیرانیش بۆ یەکێتی کە قوباد تاڵەبانی لە دوو کابینەی پێشوودا لەو پۆستەدا بوو.

ئەوەی پێویستە بیزانیت: بڕیارە ئەم سێشەممەیە پارتی و یەکێتی جارێکی دیکە کۆببنەوە، کۆبوونەوەکەش لە نێوان لیژنە تەکنیکییەکان دەبێت کە بۆ نووسینەوەی کارنامەی کابینەی حکومەت پێکهێنراوە.

زانیاریی تایبەت: ئاڤا زانیویەتی یەکێتی بۆ ئەم پۆستە سێ کاندیدی هەیە و بەهێزترینیان قوباد تاڵەبانییە، بەڵام ئەگەر قوباد تاڵەبانی ئەمجارە بە پۆستەکە ڕازی نەبوو و پۆستی باڵای دیکەی پێدرا، ئەوا دوو سەرکردەی دیکە زۆرترین چانسیان بۆ وەرگرتنی پۆستەکە دەبێت.

یەکەم: عیماد ئەحمەد، ئەندامی مەکتەبی سیاسی یەکێتییە، پێشتریش جێگری سەرۆکوەزیران بوو.

دووەم؛ هاوڕێ دارۆ شێخ نووری، ئەویش ئەندامی مەکتەبی سیاسییە و بەرپرسی بەشی دارایی یەکێتییە، کەسێکی زمانزانە و دکتۆرای هەیە. باوکیشی پێشتر بەرپرسی بەشی دارایی یەکێتی بووە، دایکیشی کە نەرمین عوسمانە، وەزیری ژینگەی عێراق بوو.