پردی زارگەلی دەکرێتەوە

ئاڤا نیوز

 

دوای هەشت ڕۆژ کارکردنی بەردەوام لە پردی زارگەلی، ئەمڕۆ پردەکە بەتەواوی چاککرایەوە. چاوەڕێ دەکرێت ئاگاداری دەستپێکردنەوەی هاتووچۆ بە شۆفێران بدرێت و هاتووچۆکردن لە ڕێگای سۆران - هەولێر ئاسایی ببێتەوە.

وێنە گەورەکە: زیاتر لە هەفتەیەکە بەهۆی تێکشکانی پردی زارگەلی هاتووچۆ لە ڕێگەی سەرەکی نێوان هەولێر و سۆران وەستاوە و شۆفێران ناچارن ڕێگەی بێخاڵ بەکاربهێنن، ئەمەش  گرفتی بۆ شۆفێران دروست کردووە بەتایبەت ئۆتۆمبێلە بارهەڵگرەکان و لە کاتژمێر 07:00ی بەیانی بۆ 07:00ی ئێوارە بۆیان نییە بە ڕێگاکەدا هاتووچۆ بکەن.

 

چیرۆکی سەرەکی: هەشت ڕۆژ بە بەردەوامی تیمەکانی چاککردن و ڕێگاوبانی سۆران لەسەر پردەکە کاریان کرد، بۆ ئەوەی لە زووترین کاتدا شاڕێی گەشتیاری بازرگانی و گەشتیاریی ناوچەکە ئاسایی ببێتەوە، کە بەهۆی خۆپێداکێشانی ترێلەیەک پردی زارگەلی تێکشکا و هاتووچۆی پەکخست.

 

ئەوەی پێویستە بیزانیت: ئێستا پردەکە ڕاستکراوەتەوە، لە ژێرەوەش بەربەستی بەهێزی بۆ دانراوە تا بەرگەی قورسایی زۆر بگرێت، هەروەها قیڕەکەشی نوێکراوەتەوە. چاوەڕێ دەکرێت ئاگاداری دەستپێکردنەوەی هاتووچۆ بە شۆفێران بدرێت.

 

لێدوانی فەرمی: ڕەجەب زوبێر، قایمقامی قەزای ناوەندیی سۆران بە ئاڤا نیوزی وت: "ئەگەر هیچ نەیەتە پێش سبەی یەکشەممە هاتوچۆ ڕێگای خەلیفان بۆ سۆران ئاسایی دەبێتەوە و شۆفێران دەتوانن ڕێگاکە بەکاربهێننەوە."