مەترسی لەسەر گەنمی جووتیارانی هەولێر و دهۆک هەیە

ئاڤا نیوز

 

بەهۆی کەم بارانبارینەوە مەترسیی لەسەر گەنمی جووتیاران لە سنووری هەولێر و دهۆک دروست بووە و تاوەکو ئێستاش پەڵەی نەداوە.

 

وێنە گەورەکە: ساڵانە لە وەرزی بارانباریندا جوتیاران چاوەڕوانی بارانی پێویست دەکەن بۆ ئەوەی بەرهەمەکانیان دابچێنن، بەڵام ئەمساڵ بەهۆی کەمی بارانبارینەوە مەترسی لەسەر بەرهەمی جوتیارانی هەولێر و دهۆک دروست بووە. 

 

لێدوانی فەرمی: هیشام عەبدولخالق، بەڕێوەبەری پلاندان لە دیوانی وەزارەتی کشتوکاڵ بە ئاڤا میدیای ڕاگەیاند: مەترسیی لەسەر زەویی جووتیاران لە سنووری هەولێر و دهۆک هەیە و ئەگەر لە ماوەی 15 ڕۆژی داهاتوودا باران نەبارێت ئەوا مەترسیی لەناوچوونی گەنمی داچێندراوی 'دێمی' هەیە.

 

زانیاریی زیاتر: بەراورد بە پار ساڵ ڕێژەی بارانبارین زۆر کەمتر بووە و کە تاوەکو ئێستا بە نزیکەی 100 ملیم دەخەمڵێندرێت.

 

ئەوەی پێویستە بیزانیت: مەترسییەکان لەسەر گەنمی جووتیاران تەنها لە سنووری هەولێر و دهۆکە، هاوکات سلێمانی و ئیدارە سەربەخۆکانی زاخۆ و سۆران، ناوچەکانی دیکە دەتوانن گەنمی پێویست بۆ هەرێمی کوردستان دابین بکەن.