وەزارەتی ناوخۆی عێراق: نزیکەی 93%ی هاووڵاتییان کارتی نیشتیمانییان دەرهێناوە

ئاڤا نیوز

 

وەزارەتی ناوخۆی عێراق دەڵێت، تا سەرەتای ئەمساڵ نزیکەی 93%ی هاووڵاتییان کارتی نیشتیمانییان دەرهێناوە، جەختیش دەکاتەوە کە بۆ دەرکردنی کارتی نیشتیمانی چیتر پێویست ناکات هاووڵاتی سەردانی پارێزگا بنەڕەتییەکەی خۆی بکات و لەو پارێزگای تیایدا نیشتەجێیە مامەڵەی بۆ دەکرێت.

 

ئەوەی پێویستە بیزانیت: حکومەتی عێراق لە ساڵی 2015ەوە پڕۆژەی کارتی نیشتیمانی بۆ هاووڵاتیان دەستپێکردووە و ئامانجیش لەو هەنگاوە بەئەلیکترۆنیکردنی مامەڵە فەرمییەکانە، هاوکات کارتی نیشتیمانی دەشبێتە جێگرەوەی ناسنامە و ڕەگەزنامە و چیتر کار بەو دوو بەڵگەنامەیە ناکرێت.
 
لێدوانی فەرمی: ئەحمەد مەعموری، بەڕێوەبەری گشتیی فەرمانگەی کارتی نیشتیمانی لە وەزارەتی ناوخۆ بە ئاژانسی فەرمی عێراقی ڕاگەیاندووە، لەکۆی 45 ملیۆن و 407 هەزار دانیشتووی وڵات، 42 مليۆن و 81 هەزار کەس کارتی نیشتیمانییان دەرکردووە، تەنیا ساڵی ڕابردووش 8 ملیۆن و 848 هەزار هاووڵاتی بوونەتە خاوەن کارتی نیشتیمانی.

 

ئەوەشی خستووەتەڕوو، لەئێستادا ناوەندی کارتی نیشتیمانی لە هەموو پارێزگاکانی عێراق هەن و هاووڵاتییان دەتوانن خۆیان تۆمار بکەن بەبێ ڕەچاوکردنی شوێنی نیشتەجێبوونیان واتە پێویست ناکات هاووڵاتی سەردانی پارێزگا بنەڕەتییەکەی خۆی بکات و لەو پارێزگای تیایدا نیشتەجێیە مامەڵەی بۆ دەکرێت.

 

بەڕێوەبەری گشتیی فەرمانگەی کارتی نیشتیمانی دەشڵێت، لەمساڵدا خزمەتگوزاریی "کارتی نیشتیمانی لە ماڵەکەت"دا کارادەبێت و ئەو هاووڵاتییانەی ناوی خۆیان لە فەرمانگەی کارتی نیشتیمانی تۆمارکردووە، پێویست ناکات بۆ وەرگرتنەوەی کارتەکە دووبارە سەردانی فەرمانگەکان بکەنەوە، بەڵکو بۆیان دەبرێتە ماڵەوە.