ئامادەکاری بۆ کۆبوونەوەی لیژنەی هاوبەشی نێوان عێراق و ئەمریکا دەکرێت

ئاڤا نیوز

عێراق و ئەمریکا تاوتوێی ئامادەکارییەکان بۆ ئەنجامدانی کۆبوونەوەی لیژنەی هاوبەشی عێراقی-ئەمریکی تایبەت بە کاراکردنی ڕێککەوتنی چوارچێوەی ستراتیژی دەکەن.

 

چیرۆکی سەرەکی: یەکشەممە 5-1-2025، فوئاد حوسێن، جێگری سەرۆکوەزیران و وەزیری دەرەوەی عێراق، لەگەڵ ئەلیزابێس کێنێدی ترودۆ، بەرپرسی کاروباری باڵیۆزخانەی ئەمریکا لە عێراق کۆبووەوە.

 

ڕاگەیێنراوی فەرمی: فوئاد حوسێن، وەزیری دەرەوەی عێراق لە پۆستێکدا لەسەر پلاتفۆرمی (X)، ڕایگەیاند، "لەگەڵ خاتوو ئەلیزابێس کێنێدی ترودۆ، بەرپرسی کاروباری باڵیۆزخانەی ئەمریکا لە عێراق پێداچوونەوەمان بە پێشهاتەکانی ناوچەکە و گرنگی بەردەوامبوون لە هەماهەنگی هەڵوێستەکان، بەتایبەتی ڕووبەڕووبوونەوەی ڕێکخراوی تیرۆریستی داعش کرد".

 

تاوتوێی ئامادەکارییەکانمان کرد بۆ ئەنجامدانی کۆبوونەوەی لیژنەی هاوبەشی عێراقی-ئەمریکی بۆ کاراکردنی ڕێککەوتنی چوارچێوەی ستراتیژی بۆ دۆستایەتی و هاوکاری نێوان هەردوو وڵات.

 

ئەوەی پێویستە بیزانیت: ڕێککەوتنی چوارچێوەی ستراتیژی کە لە تشرینی دووەمی 2009 لەنێوان ئەمریکا و عێراق واژۆ کرا، بە ڕێککەوتنی دۆستایەتی و هاوکاری نێوان هەردوولا دانرا، كە تێیدا بناغەی هاوکاریی هاوبەش و درێژخایەنی هەردوو وڵات لە حەوت بواری سەرەكیدا داڕشت.