پارتی و یەکێتی لە هەولێر کۆدەبنەوە

ئاڤا نیوز

 

شاندی دانووستانکاری پارتی و یەکێتی ئەمڕۆ یەکەمین کۆبوونەوەی خۆیان لە ساڵی نوێ دەکەن، کۆبوونەوەکە ئامادەسازییە بۆ دانانی میکانزمێک بۆ کۆبوونەوەی ڕۆژی پێنجشەممە کە لەسەر ئاستی باڵا دەکرێت.

 

وێنە گەورەکە: پارتی و یەکێتی وەک براوەی یەکەم و دووەمی هەڵبژاردنی خولی شەشەمی پەرلەمانی کوردستان، تاوەکو ئێستا دوو کۆبوونەوەیان لە پیرمام و دەباشان کردووە، بەپێی ڕاگەیێنراوەکانیان لێکتێگەیشتنی ئەرێنی لەسەر دابەشکردنی پۆستەکان دروست بووە و هەنگاوە ئەرێنییەکانیان بۆ پێکهێنانی کابینەی دەیەمی حکومەت خێراتردەکەن.

 

زانیاریی بەدەستهاتوو: پێشنیوەڕۆی ئەمڕۆ سێشەممە، شاندێکی پارتی دیموکراتی کوردستان کە پێکهاتوون لە پشتیوان سادق، ئومێد سەباح و دڵشاد شەهاب سەردانی بارەگای مەکتەبی سیاسیی یەکێتی نیشتمانی کوردستان دەکەن لە هەولێر و لەگەڵ شاندی یەکێتی کۆدەبنەوە کە ئەوانیش پێکهاتوون لە ڕێواز فایەق، ئامانج ڕەحیم و شاڵاو شێخ سەڵاح، کۆبوونەوەکەی ئەمڕۆیان بۆ ئامادەکردنی ڕەشنووسێکە بۆ کۆبوونەوەی ڕۆژی پێنجشەممە کە بڕیارە لەسەر ئاستی باڵا و لە هەولێر بکرێت.

 

زانیاریی زیاتر: شاندی پارتی و یەكێتی لە كۆبوونەوەی سێیەمی نێوانیاندا، بەرنامەیەكی هاوبەش بۆ پێكهێنانی كابینەی نوێی حكومەتی هەرێمی كوردستان ئامادە دەكەن.