پاشماوەی فڕۆکەیەکی بێ فڕۆکەوان لە باشووری عێراق دەدۆزرێتەوە

ئاڤا نیوز

هێزە ئەمنییەکانی عێراق پاشماوەی فڕۆکەیەکی بێ فڕۆکەوان لە بیابانەکانی پارێزگای سەماوا لە باشووری عێراق دەدۆزنەوە کە درێژییەکەی دوو مەتر دەبێت.

 

وێنە گەورەکە: بەهۆی ئەوەی ئاسمانی عێراق سەروەرییەکەی لە دەستی خۆی نییە و لە دەست ئەمریکایە، بە دەیان جار ئاسمانی ئەو وڵاتە لەلایەن وڵاتانی دیکەوە پێشێل کراوە، عێراقیش دان بەوە دادەنێت کە لەڕووی  سیستەمی بەرگریی ئاسمانییەوە لاوازە و هەوڵ دەدەن بۆ ئەمساڵ لە ڕێگەی چەندین گرێبەستەوە پەرە بە توانا سەربازییەکانی بدات.

 

زانیاریی بەدەستهاتوو: سەرچاوەیەکی ئەمنی فەرمی بە میدیای عێراقی ڕایگەیاندووە، هێزێکی هاوبەشی ئەمنی پاشماوەی فڕۆکەیەکی بێ فڕۆکەوانیان لە ناوچەی زەهرا دۆزیوەتەوە کە دەکەوێتە ڕۆژئاوای بیابانی سەماوا لە نزیک قەزای سەلمان لە موسەننا.

 

زانیاریی زیاتر: بە گوتەی سەرچاوەکه، لێکۆڵینەوه له پاشماوەی فڕۆکەکە دەکرێت بۆ ئەوەی جۆرەکەی بزانرێت، لە ئامانجی فڕینی بەسەر ئاسمانی ئەو ناوچە بیابانییە بکۆڵدرێتەوە، هاوکات ئەوەش بزانن کە کەی کەوتووەتە خوارەوە و موڵکی چ وڵاتێکیشیە.