خاوەن مەلیکەکانی گەرمیان دژی دەستبەسەرداگرتنی ئۆتۆمبێلەکانیان گردبوونەتەوە

ئاڤا نیوز 

 

خاوەنی ئۆتۆمبێلە بێ سەرەتاکان لە سنووری ئیدارەی گەرمیان لە بڕیاری سنووردارکردنی هاتووچۆیان ناڕازین. هاتووچۆی گەرمیانیش دەڵێت، بڕیاری دەستبەسەرداگرتنی ئەو ئۆتۆمبێلانەیان بەدەست نەگەیشتووە. 

 

بابەتی سەرەکی: ئەمڕۆ بەشێک لە خاوەنی ئۆتۆمبێلە بێ سەرەتاکان، لە پێش بەڕێوەبەرایەتی هاتووچۆی گەرمیان خۆپێشاندان دەکەن، ئەمەش دوای هەڵمەتی دەستبەسەراگرتنی ئەو ئۆتۆمبێلانە و قەدەغەی هاتووچۆیان لە سنووری پارێزگای سلێمانی دێت.

 

چیرۆکی سەرەکی: نزیکەی دوو مانگە لیژنەی باڵای ئەمنیی سلێمانی بڕیاری دەستبەسەرداگرتنی ئۆتۆمبێلە بێ سەرەتاکانی دەرکردووە و ئێستا هەڵمەتەکە بۆ کۆنترۆڵکردنیان چڕترکراوەتەوە. ئەو ئۆتۆمبێلانە لە ساڵانی ڕابردوو لەڕێی دەروازەکانی سنووری پارێزگای سلێمانی و ئیدارەی گەرمیان هێنراون و هیچکام لەو مەرجانەیان تێدانییە کە حکومەتی هەرێمی کوردستان بۆ هاوردەکردنی ئۆتۆمبێل دایناون.

 

لێدوانی فەرمی: عەمید موحسین مەنسوور، بەڕێوەبەری هاتووچۆی گەرمیان، بە ئاڤا میدیای ڕاگەیاند: فەرمانی دەستبەسەراگرتنی ئۆتۆمبێلە بێ سەرەتاکان نەگەیشتووەتە دەستیان، بەڵام ئەگەر بگات جێبەجێی دەکەن: "ئێمە ناهێڵین بە ئارەزووی خۆیان تەراتێن بەو ئۆتۆمبێلانە بکەن".

 

لێکەوتەکان: زیاتر لە 60 هەزار لەو ئۆتۆمبێلانە بە قاچاخ و شێوەی نافەرمی هێنراونەتە کوردستان و بە خەڵک فرۆشراون، ئەوانەی ئێستا خاوەنی ئەو ئۆتۆمبێلانەن داواکارن تۆمار بکرێن، ژمارەیان پێبدرێت یان  کۆد. بەڵام لایەنی حکومەت تاوەکو ئێستا هیچ بڕیارێکی لەوشێوەیەی نییە.