لە سنووری کەرکووک ژمارەیەک چەکداری داعش کوژران

ئاڤا نیوز 

 

فەرماندەیی ئۆپەراسیۆنە هاوبەشەکانی عێراق ڕایگەیاند، لە زنجیرە چیای حەمرین لە سنووری فەرماندەیی ئۆپەراسیۆنە هاوبەشەکانی کەرکووک، ژمارەیەک پێگەی داعشیان بۆردوومانکردووە و لە ئەنجامیشدا ژمارەیەک چەکداری ڕێکخراوەکە کوژراون.

 

وێنە گەورەکە: هەرچەندە لە ساڵی 2017ـەوە کۆتاییهاتنی داعش وەکو ڕێکخراوێک ڕاگەیێنراوە، بەڵام شانە نوستووەکانی ڕێکخراوەکە ماون و هەندێکجار هێزە ئەمنییەکان و هاووڵاتیانی عێراق بەئامانج دەگرن.

 

ڕاگەیێنراوی فەرمی: فەرماندەیی ئۆپەراسیۆنە هاوبەشەکانی عێراق لە ڕاگەیێنراوێکدا ئاماژەی بەوەکردووە، لەسەر بنەمای زانیاریی هەواڵگریی و بە پشتیوانی هونەریی و زانیاریی هێزەکانی هاوپەیمانی نێودەوڵەتی، لەڕێگەی فڕۆکەی ئێف 16ەوە ژمارەیەک مۆڵگە و حەشارگەی داعش لە زنجیرە چیای حەمرین لە سنووری فەرماندەیی ئۆپەراسیۆنە هاوبەشەکانی کەرکووک بۆردوومانکراون.

 

لێکەوتەکان: لە ڕاگەیێنراوەکەدا ئاماژە بە ژمارەی ئەو چەکدارانەی داعش نەکراوە کە لە حەشارگەکاندا بوون، بەڵام ئاشکرای کردووە کە حەشارگەکان بە تەواوی خاپوورکراون و ژمارەیەک چەکداری ڕێکخراوەکەش کوژراون.