لە هەولێر بۆ یەکەمجار ڕۆبۆتێک نەشتەرگەرییەکی دەگمەن دەکات

ئاڤا نیوز 

نەخۆشخانەی ڕزگاری هەولێر نۆژەن دەکرێتەوە و فروان دەکرێت، چەند بەشێکی نوێی بۆ زیاد دەکرێن بە چەندین پسپۆری جیاواز، سەنتەرێکی دڵیشی تێدا دەبێت بۆ گەوران و منداڵان، بۆ یەکەمجاریش لەڕێگای ڕۆبۆت نەشتەرگەری تێدا دەکرێت.

وێنە گەورەکە:  د. سامان بەرزنجی، وەزیری تەندروستیی نەخۆشخانەکەی بەسەر کردەوە، کە یەکێکە لە گەورەترین کۆمەڵگا پزیشکییەکانی هەرێمی کوردستان و لە کۆنگرەیەکی ڕۆژنامەوانیدا ڕایگەیاند، سەرەرای نۆژەنکردنەوەی 21 بەشی نەخۆشخانەی ڕزگاری، بەڵام پێشوازیکردن لە نەخۆش بەردەوامە، بۆ ئەوەی هیچ کەسێک پەکی نەکەوێت نەخۆشخانەکەیان دانەخستووە.

لێدوانی فەرمی: د. لاوەند میران، بەڕێوەبەری نەخۆشخانەی ڕزگاری بە ئاڤا میدیای ڕاگەیاند: ئەم جۆرە نەشتەرگەریە یەكەمجارە لەسەر ئاستی عێراق و هەرێمی كوردستان دەكرێت، لەسەر ئاستی ڕۆژهەڵاتی ناوەڕاست تەنیا لە وڵاتانی توركیا و سعوودیە هەیە،

ئەو جۆرە ڕۆبۆتە بەكاردێت بۆ ئەنجامدانی نەشتەرگەرییە گەورەكانی وەك دڵ و شێرپەنجەی پرۆستات و گورچیلە و كۆئەندامی میزەڕۆ و چەندین نەشتەرگەریی دیكەی گەورە. وا بڕیارە لە ماوەیەكی نزیكدا ئەم سەنتەرە كارەكانی تەواوبكرێت و بخرێتە خزمەتی هاووڵاتیانەوە.

سەبارەت بە تێچووی نەشتەرگەری لەم سەنتەرە، د. لاوەند گوتی: تێچووی نەشتەرگەری لە سەنتەرەكە هاوشێوەی تێچووی نەشتەرگەرییەكانی سەنتەری دڵە كە بە نیمچە تایبەت هەژمار دەكرێت.

ئەوەی پێویستە بیزانیت: لەلایەن پزیشكێكی نەشتەرگەری پسپۆرەوە، ڕۆبۆتەكە بەرنامەڕێژ دەكرێت، نەخۆشەكە دەخرێتە ژێر دەستی ڕۆبۆتەكە و پزیشكەكە لەڕێگەی دەسكێكەوە هاوشێوەی دەسكی ئاتاری و پلەیستەیشن وردە وردە خەریك دەبێـت و ئیعاز دەداتە ڕۆبۆتەكە،  ڕۆبۆتەكەش بە ڕێکوپێکی ئیشی خۆی دەكات.