سەردانەکەی سەرۆکوەزیران بارزانی لە چاوی میدیا جیهانییەکانەوە

ئاڤا نیوز

 

سەردانی سەرۆکوەزیران بارزانی بۆ ئەمریکا و دیدار و کۆبوونەوەکانی سەرنجی میدیاکانی جیهانی بۆ خۆی ڕاکێشاوە و بە گرنگییەوە باسی دەکەن، "وەک پاڵپشتییەک بۆ پاراستنی هەرێمی کوردستان لێکدانەوەی بۆ دەکەن".

 

وێنە گەورەکە: سەرۆکوەزیران بارزانی بە بانگهێشتی فەرمی، سەردانی واشنتنی کردووە و چەندین دیدار و کۆبوونەوەی لەگەڵ بەرپرسانی باڵای ئەمریکادا هەبووە، ئەم سەردانەی سەرۆکوەزیران بارزانی لە میدیا جیهانییەکانەوە بە گرنگییەوە باس دەکرێت. 

 

ئەوەی لەبارەیەوە دەگوترێت:

ڕۆژنامەی عەرەبی: سەردانەکەی سەرۆکوەزیران بارزانی بۆ واشنتن مانای "نوێبوونەوەی" پاڵپشتیی ئیدارەی بایدنە بۆ پاراستنی کوردستان لە گوشارەکانی ئێران و هاوپەیمانەکانی.

 

ئینتەرناشناڵ نیوز: کۆبوونەوەکە دوای دانوستانەکانی نێوان بەغدا و واشنتن  سەبارەت بە ئەگەری دەرکردنی "هێزەکانی دژە داعشی ئەمریکا" لە خاکی عێراق دێت، لەکاتێکدا هێزەکانی ئەمریکا لە ساڵی 2014ـەوە لە عێراق شەڕ دژی داعش دەکات.

 

ئاژانسی ئانادۆڵۆی تورکی: ئەمریکا حکومەتی هەرێمی کوردستان بە "هاوبەشێکی کاریگەر" بۆ سەقامگیری ناوچەکە دەبینێت.

 

بلوومبێرگ: لە ژوورێکی پڕ لە مێژوو و بەڵێنی ئایندەیەکی هاوبەش، ئەنتۆنی بلینکن وەزیری دەرەوەی ئەمریکا پێشوازییەکی گەرمی لە مەسرور بارزانی، سەرۆکوەزیرانی هەرێمی کوردستان و شاندی حکومەتی هەرێمی کوردستان کرد.