پارتی و یەکێتی ڕەشنووسی بنەماکانی ڕێککەوتنی کابینەی دەیەم دەنووسنەوە

 

ئاڤا نیوز 

 

لەماوەی دوو ڕۆژی ڕابردوو لیژنەی هاوبەشی تەکنیکی پارتی و یەكێتی زیاتر لە 15 کاتژمێر و لە دوو شوێنی جیاواز دوو کۆبوونەوەی داخراویان کرد، بەبێ ئەوەی دوای کۆبوونەوەکان هیچ ڕاگەیێنراوێک و قسەیەک بۆ میدیاکان بکەن، ئەمڕۆش درێژە بە کۆبوونەوەکانیان دەدەن.

 

وێنە گەورەکە: دوای هەڵبژاردنی خولی شەشەمی پەرلەمانی کوردستان، دووجار شاندی دانووستانکار و دوو جاریش لیژنەی تەکنیکی ئەو دوو حیزبە کۆبوونەتەوە بەمەبەستی ئامادەکردنی ڕەشنووسی گفتوگۆکانی پێکهێنانی کابینەی نوێی حکومەت و کۆبوونەوەی سێیەمی شاندی باڵای هەردوولاش پەیوەستە تەواوبوونی کارەکانی ئەو لیژنەیە.

 

زانیاریی پەیامنێر: شەوکەت قادر، پەیامنێری ئاڤا لە هەولێر ڕایگەیاند: "پێشنیوەڕۆی ئەمڕۆ لە هۆڵی سەعد عەبدوڵڵا سێیەم کۆبوونەوەی لیژنەی هاوبەشی تەکنیکی پارتی و یەكێتی بەڕێوەدەچێت، بەمەبەستی تەواوکردنی ڕەشنووسی بنەماکانی ڕێککەوتن لەسەر پێکهێنانی کابینەی دەیەمی حکومەتی هەرێمی کوردستان".

 

زانیاریی تایبەت: ئاڤا زانیویەتی لەماوەی دوو ڕۆژی ڕابردوو هەنگاوی ئەرێنی لەسەر بنەمای هاوبەش نراوە، تاوتوێی پشک و شەراکەتی هەردوولا لە پێکهێنانی کابینەی دەیەمی حکومەتی هەرێمی کوردستان کراوە، بەرپرسانی باڵای هەردوولاش لە ڕێگەی تەلەفۆنەوە وردەکاریی نووسینەوەی ڕەشنووسەکەیان پێ ڕاگەیێنراوە.

 

ئەمەش بزانە: ئەندامانی شاندی تەکنیکی پارتی پێکهاتوون لە د. پشتیوان سادق، دڵشاد شەهاب و ئومێد سەباح، ئەندامانی شاندی تەکنیکی یەکێتیش پێکهاتوون لە د.ڕێواس فایەق، ئامانج ڕەحیم و شاڵاو شێخ سەڵاح، ئەم کۆبوونەوەیە تەواوکاری کۆبوونەوەی دوێنێی نێوان ئەم دوو حیزبەیە کە لە بارەگای مەکتەبی سیاسیی یەکێتی بەڕێوەچوو.