لە كەركووك 7 داعش لە بۆردوومانێكی ئاسمانیدا دەكوژرێن

ئاڤا نیوز

 

سەرچاوەیەكی ئەمنی لە شاری كەركووك ڕایدەگەیێنێت، لە بۆردوومانێكی فڕۆكە جەنگییەكانی عێراقدا جێگری والیی داعش و شەش چەكداری دیكەی پاشماوەكانی ئەو ڕێكخراوە دەكوژرێن.

 

وێنە گەورەكە: هێزی ئاسمانیی عێراقی ئۆپەراسیۆنێكی ئاسمانی لەدژی پاشماوەكانی داعش لە دەوروبەری چیای حەمرین لە پارێزگاكانی كەركووك و دیالە ئەنجامدا و سەرچاوە ئەمنییەكان باس لە كوژرانی 7 تیرۆرستی داعش دەكەن كە یەكێك لە كوژراوەكان جێگری والی بەناوی ویلایەتی كەركووكە.

 

ڕاگەیێنراوی فەرمی: سەرچاوەیەكی ئەمنی لە فەرماندەیی ئۆپەراسیۆنەكانی كەركووك بە میدیا عێراقییەكانی ڕاگەیاند:

 

- ئێوارەی ڕۆژی پێنجشەممە ئۆپەراسیۆنێكی ئاسمانی بۆ لەناوبردنی شانە نووستووەكانی داعش و مۆڵگەی تیرۆرستان لە دەوروبەری چیای حەمرین کراوە، بە هۆیەوە جێگری والیی داعش لە ویلایەتی كەركووك و شەش لە یاریدەدەرەكانی كوژراون.

 

- لەنێو تەرمی كوژراوەكاندا، كەسێك دۆزراوەتەوە كە بە (ئەبو عوبەیدە) ناونرابوو، جێگری والی بەناو ویلایەتی كەركووكی ڕێكخراوی داعش بووە.

 

- دوای خاپووركردنی بارەگایەکی تیرۆرستان، چەكی جۆری ئێم-16 و دووربینی حەراری و دوو بۆمبی دەستی و پشتێنی تەقەمەنی دۆزراونەتەوە لەگەڵ چەندین كەلوپەلی دیكەی لۆجستی بۆ ئەنجامدانی كردەی تیرۆرستی.