وەزیری دەرەوەی سووریا سەردانەکەی بۆ عێراق هەڵدەوشێنێتەوە

ئاڤا نیوز

 

بەهۆی سەردانی بەرپرسێکی باڵا بۆ وڵاتەکەی، وەزیری دەرەوەی حکومەتی ڕاگوزەری سووریا سەردانەکەی بۆ عێراق هەڵوەشاندەوە. 

 

وێنە گەورەکە: بریاربوو ئەمڕۆ شەممە 11-1-2025  ئەسعەد شەیبانی، وەزیری دەرەوەی سووریا سەردانی بەغدا بکات و لەگەڵ هەریەکە لە فوئاد حوسێن، وەزیری دەرەوەی عێراق و محەممەد شیاع سوودانی، سەرۆکوەزیرانی عێراق کۆببێتەوە.

 

لێدوانی فەرمی: سەرچاوەیەک لە نووسینگەی سەرۆکوەزیرانی عێراق بە ئاڤا میدیای ڕایگەیاند: بەهۆی سەردانێکی چاوەڕواننەکراوی نەجیب میقاتی، سەرۆکوەزیرانی لوبنان بۆ سووریا، ئەسعەد شەیبانی وەزیری دەرەوەی حکومەتی ڕاگوزەری سووریا سەردانەکەی بۆ عێراق بۆ کاتێکی نادیار هەڵوەشاندەوە.

 

ئەمەش بزانە: ئامانج لە سەردانەکەی شەیبانی بۆ بەغدا و کۆبوونەوەی لەگەڵ بەرپرسانی عێراق، گفتوگۆکردنە سەبارەت بەچەند پرسێکی پەیوەست بە  ئاسایشی سنووری هاوبەش، کردنەوەی دەروازە فەرمییەکان، دەستپێکردنەوەی گەشتە ئاسمانییەکان و گەڕانەوەی چالاکییە ئابووری و بازرگانییەکانی نێوان هەردوو وڵاتە.