ڕێباز حەملان: نەوەی نوێ و یەکگرتوو و کۆمەڵ لە پرسی مووچە لەگەڵ ئێمە هاوڕان

ئاڤا نیوز

 

بریکاری وەزارەتی دارایی حکومەتی عێراق باس لەوە دەکات، کە هەموو لایەنە سیاسییەکان بە نەوەی نوێ و یەکگرتوو و کۆمەڵیشەوە هاودەنگ و هاوهەڵوێستن بۆ پرسی مووچە.

 

وێنە گەورەکە: ئەمڕۆ 11-1-2025، کۆبوونەوەی نائاسایی ئەنجوومەنی وەزیرانی هەرێمی کوردستان بە بەشداری بەشێک لە نوێنەران و بەرپرسانی کورد لە بەغدا سازکرا، تێدا پرسی شایستە داراییەکانی هەرێمی کوردستان و مافە دەستوورییەکان و پێشێلکردنی لەلایەن حکومەتی عێراقەوە تاوتوێ کرا، جەخت لە یەک هەڵوێستی کورد لەوبارەیەوە کرایەوە.

 

لێدوانی فەرمی: ڕێباز حەملان، بریکاری وەزارەتی دارایی حکومەتی عێراق، لەمیانی بەشداریکردنی لە گەشتی هەواڵەکانی کاتژمێر 07:00ی ئاڤا میدیا ڕایگەیاند:

 

- هەرچەندە یەکگرتوو، کۆمەڵ، نەوەی نوێ بەشداری کۆبوونەوەکەیان نەکرد، بەڵام پەیوەندیان بە شاخەوان عەبدوڵڵا جێگری سەرۆکی پەرلەمان کردووە، پێیان ڕاگەیاندووە کە لە پرسی مووچەدا هاوڕا دەبن.

 

- جێگری سەرۆکی پەرلەمان باسی لە کۆکردنەوەی هەموو فراکسیۆنە کوردستانییەکان و چوونە لای محەممەد شیاع سوودانی سەرۆکوەزیرانی عێراق کرد، بۆ ئەوەی فشارێک دروست بکرێت، تاوەکو ئەم کێشانە بەردەوام نەبن.