پەرلەمانتارێکی یەکگرتوو: دەبێت بە یەک پاکێج مامەڵە لەگەڵ بەغدا بکرێت

ئاڤا نیوز

 

ڕۆژی شەممە کۆبوونەوەیەکی نائاسایی لە ئەنجوومەنی وەزیران بەئامادەبوونی سەرۆکوەزیران مەسرور بارزانی و وەزیر و نوێنەرانی فراکسیۆنە کوردییەکان لە بەغدا بەڕێوەچوو، بەڵام نەوەی نوێ و یەکگرتوو و کۆمەڵ بەشداریان تێدا نەکرد، پەرلەمانتارێکی یەکگرتووش دەڵێت، پێموایە هەمیشە بە یەکڕیزی توانراوە دەستکەوتی گەورە بەدەستبهێنرێت.

 

وێنە گەورەکە: کۆبوونەوە چارەنووسسازەکەی ڕۆژی ڕابردووی ئەنجوومەنی وەزیران تایبەت بوو بە پرسی مووچەی مووچەخۆران و بودجە و پێشێلکارییە دەستوورییەکانی بەغدا کە بەرامبەر هەرێمی کوردستان دەیکات، دوا بەدوای کۆبوونەوەکە چەندین پەیامی تایبەت ئاڕاستەی حکومەتی فیدراڵکران و بڕیارە نوێنەرانی کوردیش ئەو ڕاسپاردانە پێشکەش بە کاربەدەستانی ناوەند بکەن. 

 

لێدوانی فەرمی: دارا سێکانیانی، ئەندامی فراکسیۆنی یەکگرتوو لە پەرلەمانی عێراق، لەمبارەیەوە بە ئاڤا میدیای ڕاگەیاند: 

 

- گرنتی بۆ شایستە داراییەکانی کورد دروست نەبووە، تاوەکو هەرێمی کوردستان سەقامگیری ئابووری و ئیداری بەخۆیەوە ببینێت.

 

-ئەو کێشانەی لە هەرێمی کوردستان هەبوون بۆ بەغدا گواسترایەوە، ئەوەش کاریگەریی لەسەر پێگە و سەنگی کورد دروست کرد.

 

- پێویستە بە یەک پاکێجی هاوبەش و بە یەک تیم مامەڵە لەگەڵ بەغدا و دەرەوە بکرێت، هەروەها بۆ بەرژەوەندی خەڵکی کوردستان کار بکرێت.

 

-پێموایە هەمیشە بە یەکڕیزی توانراوە دەستکەوتی گەورە بەدەستبهێنرێت، بەڵام بەهۆی تەفرەقەوە زۆر جار دەستەکەوتەکانمان لەدەست داوە و سەنگی کوردیش لاواز کردووە.