وەزیری ناوخۆی عێراق: دیواری کۆنکرێتی بەدرێژایی سنووری سووریا دروست دەکەین

ئاڤا نیوز

 

وەزیری ناوخۆی عێراق ڕایدەگەیێنێ، بە درێژایی سنووری سووریا دیواری کۆنکرێتی دروست دەکەن. وەزیری ناوخۆی عێراق دەشڵێت، "هێشتا گرووپە تیرۆریستییەکان چالاکن لە نێوخۆی سووریا."

 

وێنە گەورەکە: دوای ڕووخانی دەسەڵاتی ئەسەد لە سووریا، عێراق نیگەرانیی خۆی لە ئەگەری سەرهەڵدانەوە و بەهێزبوونی تیرۆریستان دەربڕیوە و ڕێکاری تووندی ئەمنیی لەسەر سنووری خۆی لەگەڵ سووریا گرتەبەر.

 

لێدوانی فەرمی: عەبدولئەمیر شەممەری، وەزیری ناوخۆی عێراق لە چاوپێکەوتنێکی تەلەفزیۆنیدا گوتی: کار لەسەر تەواوکردنی دروستکردنی دیواری کۆنکرێتی لەسەر سنووری سووریا لە قائیم دەکەین و سەرجەم دەروازە سنوورییەکانمان لەگەڵ سووریا داخستووە.

 

گۆشەیەکی دیکە: شەممەری دەربارەی قاچاخچێتی ماددە هۆشبەرەکان دەڵێت: چەند کارگەیەکی بەرهەمهێنانی حەبی کەپتاگۆن لە سووریا هەبوون، بە چەندین ڕێگە دەهێنرانە عێراق و وڵاتانی دراوسێ. شەممەری دووپاتیشی کردەوە، دوای داخستنی سنوور لەگەڵ سووریا هاتنی ماددە هۆشبەرەکانیش وەستاوە.

 

ئەوەی پێویستە بیزانیت: دوای ڕووخانی ئەسەد و ڕاگرتنی کاری تیمی دیپلۆماسی عێراق لە سووریا لەو کاتەدا، ئێستا حکومەتی نوێی سووریا و عێراق پەیوەندیی دیپلۆماسییان ئاسایی کردووەتەوە و بڕیارە بەمنزیکانە ئەسعەد شیبانی، وەزیری دەرەوەی سووریا سەردانی عێراق بکات و لەگەڵ بەرپرسانی باڵای ئەو وڵاتە کۆ ببێتەوە.