کۆنگرێسی ئەمریکا: بە هەموو شێوەیەک لەگەڵ بەهێزبوونی هەرێمی کوردستانین

ئاڤا نیوز

ئەندامانی کۆنگرێسی ئەمریکا پشتیوانی بۆ سەرۆکوەزیران بارزانی دووپاتدەکەنەوە و ڕایدەگەیێنن بە هەموو شێوەیەک لەگەڵ بەهێزبوونی هەرێمی کوردستانن.

بۆچی گرنگە: دوای فشارە بەردەوامەکانی حکومەتی عێراق و بڕیارەکانی دادگای فیدراڵی دژی هەرێمی کوردستان، پشتیوانی ئەندامانی کۆنگرێس و بەرپرسانی باڵای ئەمریکا بۆ هەرێمی کوردستان، هاوکار دەبێت بۆ چارەسەرکردنی کێشەکانی نێوان هەولێر و بەغدا.

چیرۆکی سەرەکی: مەسرور بارزانی، سەرۆکوەزیرانی هەرێمی کوردستان، ئەمڕۆ پێنجشەممە لە میانی سەردانەکەیدا بۆ واشنتن لەگەڵ نانسی پیلۆسی، سەرۆکی پێشووی ئەنجوومەنی نوێنەرانی ئەمریکا و سێس مێڵتن، دۆن بەیکن، براد وێنسترەپ و ئەماتا کۆلمەن، ئەندامانی ئەنجوومەنی نوێنەران کۆبووەوە.

نێوەڕۆکی کۆبوونەوە:  باسی کێشەکانی نێوان هەولێر و بەغدا کراوە و سەرۆکوەزیران بارزانی سوپاسی هاریکاری و پشتیوانیی ئەمریکای کردووە. ئاماژەی بە گرنگی جێبەجێکردنی دەستووری عێراق و، دابینکردنی مافە دەستوورییەکانی گەلی کوردستان و، پاراستن و ڕێزگرتن لە قەوارەی دەستووری و فیدراڵی هەرێمی کوردستان کردووەتەوە.

ڕاگەیێنراوی فەرمی: ئەندامانی کۆنگرێس سەرۆکوەزیران بارزانیان وەک جەنگاوەر و خەباتکاتکارێکی ڕێگەی ئازادی ناساندووە، جەختیان لە گرنگی پاراستنی ئاسایش و ئارامی و سەقامگیریی هەرێمی کوردستان کردووەتەوە و ڕایانگەیاندووە، بە هەموو شێوەیەک لەگەڵ بەهێزبوونی هەرێمی کوردستانن.