بە بەشداریی نێچیرڤان بارزانی و بافڵ تاڵەبانی هاوپەیمانیی ئیدارەی دەوڵەت کۆدەبێتەوە

ئاڤا نیوز

 

بەهۆی دۆخی ڕۆژهەڵاتی ناوەڕاست و گۆڕانکارییە خێراکان، بە تایبەت لە سووریا، سەرکردە سیاسییەکانی عێراق کۆدەبنەوە. هەریەکە لە سەرۆکی هەرێمی کوردستان و سەرۆکی یەکێتی لە کۆبوونەوەکەدا بەشدار دەبن.

 

وێنە گەورەکە: ئەمشەو لە بەغدا نێچیرڤان بارزانی، سەرۆکی هەرێمی کوردستان و بافڵ تاڵەبانی، سەرۆکی یەکێتی بەشداری لە کۆبوونەوەی هاوپەیمانی ئیدارەی دەوڵەت دەکەن کە هەموو لایەنە پێکهێنەرەکانی حکومەتی عێراق لەخۆدەگرێت و سوودانیش بەشدار دەبێت.

 

لێدوانی فەرمی: سەرچاوەیەکی باڵا و ئاگادار لە بەغدا بە ئاڤای گوت: لە کۆبوونەوەکەدا باسی ڕەوشی ناوچەکە بەگشتی و دۆخی سووریا  و گۆڕانکارییە خێراکانی ڕۆژهەڵاتی ناوەڕاست دەکرێت کە بێگومان کاریگەرییان لەسەر عێراقیش دەبێت.

زانیاریی تایبەت: ئاڤا زانیویەتی باسی مووچە و بودجە ناکرێت و بەگشتی باسی بابەتەکان دەکەن، واتا ناچنە ناو وردەکارییەکانەوە، تەنیا ئەوەندە نەبێت ئەگەر دەرفەت هەبێت نێچیرڤان بارزانی پەیامی هەرێمی کوردستان لەبارەی مووچە و بودجە بە لایەنەکان دەگەیێنێت، کە هیچ یەکێک لە ڕێککەوتنەکان وەکو خۆیان جێبەجێ نەکراون، تەنانەت ڕێککەوتنی پێکهێنانی حکومەتی ئێستای عێراقیش کە سوودانی سەرۆکایەتیی دەکات.