نێچيرڤان بارزانى و موسەننا سامەڕائی هه‌موارکردنه‌وه‌ی یاسای بودجه‌ تاوتوێ دەکەن

ئاڤا نیوز 

 

نێچيرڤان بارزانى، سه‌رۆكى هه‌رێمى كوردستان، لەگەڵ موسەننا سامەڕائی، سەرۆکی هاوپەیمانيی عەزم کۆبووەوە و باسیان لە هه‌موارکردنه‌وه‌ی یاسای بودجه‌ و پێویستيی پاراستنی مافەکانی هەموو پێکهاتەکانی عێراق و دەستەبەرکردنی یەکسانی لە نێوانیاندا کردەوە. 

 

وێنە گەورەکە: سەرۆکی هەرێمی کوردستان لە ڕۆژی یەکشەممەوە سەردانی بەغدای کردووە، دوای کۆبوونەوەی لەگەڵ سەرکردەکانی هاوپەیمانی ئیدارەی بەڕێوەبردنی دەوڵەت، گەڕێکی سەردانی بۆلای لایەنە سیاسییەکانی عێراق دەستپێکردووە بە ئامانجی دۆزینەوەی ڕێگا چارەیەک چارەسەری گرفتە داراییەکانی نێوان هەولێر و بەغدا. 

 

ڕاگەیێنراوی فەرمی: سەرۆکایەتیی هەرێمی کوردستان لە ڕاگەیێنراوێکدا ڕایگەیاند: لە کۆبوونەوەکەدا هەردوولا دۆخی سیاسیی وڵات و چۆنیه‌تیی بەهێزکردنی پەیوەندییەکانی حکوومەتی عێراقی فیدراڵ و حکوومەتی هەرێمی کوردستانيان تاوتوێ كرد، بە شێوەیەک کە یارمەتيی سەقامگیريی عێراق بدات و کاری هاوبەش بۆ چارەسەرکردنی كێشه‌کان پەرە پێبدات.

 

هەر لەمیانەی کۆبوونەوەکەدا هەردوولا تیشکیان خسته‌ سه‌ر هه‌موارکردنه‌وه‌ی یاسای بودجه‌ و جەختیان لەسەر پێویستيی پاراستنی مافەکانی هەموو پێکهاتەکانی عێراق و دەستەبەرکردنی یەکسانی لە نێوانیاندا کردەوە، بە شێوەیەک کە پێکەوەژیانی ئاشتیيانە بەهێز بکات و گيانى دادپەروەری وه‌ک لە دەستووری عێراقدا هاتووە، بەرجەستە بکات.

 

لەلایەکی دیکەوە: لە ته‌وه‌رێکی دیکه‌ی كۆبوونه‌وه‌كه‌دا، باس لە دۆخی ناوچه‌كه‌ کرا و هەردوولا جەختیان لەسەر گرنگيی به‌رپرسیاریه‌تیی هاوبه‌ش و هه‌ماهه‌نگى و هاريكاريى هه‌موو هێز و لايه‌نه‌ عێراقييه‌كان بۆ پاراستنى ئارامى و سه‌قامگيرى كرده‌وه‌.