پەرلەمانی عێراق دوو ساڵ تەمەنی کۆمیسیۆنی هەڵبژاردنەکانی درێژکردەوە

ئاڤا نیوز

 

پەرلەمانی عێراق دەنگ لەسەر درێژکردنەوەی ماوەی ئەنجوومەنی کۆمیسیارانی کۆمیسیۆنی باڵای سەربەخۆیی ھەڵبژاردنەکانی عێراق بۆ ماوەی دوو ساڵ دەدات.

 

وێنە گەورەکە: ڕۆژی 8-1-2025، ئەنجوومەنی باڵای دادوەری بڕیاریدا دوو ساڵ تەمەنی ئەنجوومەنی کۆمیسیارانی کۆمیسیۆنی باڵای سەربەخۆیی ھەڵبژاردنەکانی عێراق درێژبکرێتەوە. ئەمڕۆش پەرلەمانی دەنگی لەسەر ئەو درێژکردنەوەیەدا.

 

ڕاگەیێنراوی فەرمی: نووسینگەی ڕاگەیاندنی ئەنجوومەنی نوێنەرانی عێراق ڕایگەیاند: لە کۆبوونەوەی ئەمڕۆ دەنگ لەسەر درێژکردنەوەی ماوەی ئەنجوومەنی کۆمیسیارانی کۆمیسیۆنی باڵای سەربەخۆیی ھەڵبژاردنەکانی عێراق بۆ ماوەی دوو ساڵ درا.

 

لێدوانی فەرمی: ئەوکاتەی ئەنجوومەنی باڵای دادوەری بڕیاریدا دوو ساڵ تەمەنی ئەنجوومەنی کۆمیسیاران بۆ ماوەی دوو ساڵ درێژبکرێتەوە. د. عیماد جەمیل، سەرۆکی تیمی ڕاگەیاندنی کۆمیسیۆنی باڵای سەربەخۆی هەڵبژاردنەکانی عێراق بە ئاڤا میدیای ڕاگەیاندبوو: لەسەر داوای زۆربەی هێز و لایەنە سیاسییەكان، ماوەی تەمەنی کۆمیسیۆنی باڵای سەربەخۆیی ھەڵبژاردنەکانی عێراق تاوەکو دوو ساڵی دیکە درێژکرایەوە.

 

ئەوەی پێویستە بیزانیت: ڕۆژی 07-01-2025، تەمەنی ئەنجوومەنی کۆمیسیارانی کۆمیسیۆنی باڵای سەربەخۆیی ھەڵبژاردنەکانی عێراق كۆتاییهات، ئەمەش لە كاتێكدایە کە بڕیارە ئەمساڵ هەڵبژاردنی پەرلەمانی عێراق بەڕێوەبچێت و بە یەکێک لە هەڵبژاردنە گرنگەکان ناوزەندی دەکەن، بۆیە زۆرینەی هێز و لایەنە سیاسییەكان كۆكبوون لەسەر درێژكردنەوەی تەمەنی كۆمیسیۆن.

 
باکگراوند: بڕیارە مانگی 10ی ئەمساڵ، هەڵبژاردنی پەرلەمانی عێراق بەڕێوەبچێت، چاوەڕوان دەکرێت ڕکابەرییەکی تووند لە نێوان لایەنە سیاسیەکان هەبێت و گۆڕانکاریش لە نەخشەی سیاسیی ئێستای عێراق ڕووبدات.