بەریتانیا و عێراق پەیوەندییەکانیان بەهێزتر دەکەن

ئاڤا نیوز
 

سەرۆکوەزیرانی عێراق لەگەڵ پادشای بەریتانیا کۆبووەوە و هەردوولا جەختیان لە زیاتر گەشەپێدانی پەیوەندییەکانی نێوان هەردوو وڵات بەگشتی و بەتایبەت لەبوارەکانی ئابووریی و گەشەپێدان کردووەتەوە.

 

وێنە گەورەکە: عێراق و بەریتانیا لە هەوڵی پتەوکردنی پەیوەندییە دوو قۆڵییەکانن و لە ڕابردووشدا هەردوو وڵات واژۆیان لەسەر چەندین یاداشت پەیوەست بە هاوکاریی ئەمنیی و کردووە و لە هەوڵی پەرەپێدانی زیاتری ئەو ڕێککەوتن و یاداشتانەن لە بوارەکانی ئابووری و وەبەرهێناندا.

 

ڕاگەیێنراوی فەرمی: نووسینگەی سەرۆکوەزیرانی عێراق ڕایگەیاند، محەممەد شیاع سوودانی، سەرۆکوەزیران لە کۆشکی بەکینگهامی لەندەن، لەگەڵ شا چارلسی سێیەم، پادشای بەریتانیا کۆبووەوە و تاوتوێی پەیوەندییەکانی نێوان بەغدا و لەندەن و چۆنیەتی بونیادنانی هاوبەشی بەرهەمدار لەبوارە جیاوازەکانی ئابووری و گەشەپێدان کرا.

 

نووسینگەی سەرۆکوەزیران باسی لەوەشکردووە، شا چارلسی سێیەم بەخێرهاتنی سوودانی کردووە و ئاماژەی بە قوڵایی مێژوویی پەیوەندییەکانی نێوان عێراق و بەریتانیا کردووە، هاوکات ئاماژەی بە ئەو گرنگییە بەرچاوە داوە کە حکومەتەکانی هەردوو وڵات دەیدەن بە ئامانجی پەرەپێدانی بەرژەوەندی و لێکتێگەیشتنە هاوبەشەکان لە ئاستە جیاجیاکاندا.

 

باکگراوند: ڕۆژی 13-1-2025 سوودانی بە سەردانێکی فەرمی گەیشتە بەریتانیا و بڕیارە لەگەڵ کاربەدەستانی ئەو وڵاتە کۆببێتەوە و چەند ڕێککەوتنێکی ستراتیژی واژۆ بکەن.