بەریتانیا بە هاوکاری ئەنجوومەنی ئاسایش سێ قاچاخچی کورد لەسنووری سلێمانی دەستگیر دەکات

ئاڤا نیوز 

 

سێ تۆمەتبار کە بەشێک بوون لە تۆڕێکی جیهانی قاچاخچێتی بە مرۆڤ بۆ گواستنەوەی کۆچبەران لە هەرێمی کوردستانەوە بۆ بەریتانیا و ئەوروپا لە لایەن بەریتانیا و بەهاوکاری ئەنجوومەنی ئاسایشی هەرێمی کوردستان دەستگیرکران.

 

ڕاگەیێنراوی فەرمی: دەزگای بەرەنگاربوونەوەی تاوانی بەریتانیا بۆ جێبەجێکردنی یاسا ڕایگەیاند، بە هاوکاری لەگەڵ ئەنجومەنی ئاسایشی هەرێمی کوردستان سێ کەسیان بە تۆمەتی قاچاخچیتی بە مرۆڤەوە لە سنووری سلێمانی دستگیرکردووە.

 

ئەوەشی خستووەتە ڕوو کە، ئەو سێ کەسە پەیوەندییان بە هەمان تۆڕی ئامانج حەسەنزادە سزای 17 ساڵ زیندانیکردنی لە بەریتانیا بۆ دەرکرا، ئەوەش لەسەر ئەوەی کۆچبەری بە نایاسایی بە بەلەمی بچووک بە نۆکەندی ئینگلیزدا گەیاندووەتە بەریتانیا.

 

ئەمەش بزانە: یەکێک لەو دەستگیرکراوانە پیاوێکی تەمەن 38 ساڵە کە تۆمەتبارکراوە بە کارکردن لەگەڵ تۆڕی قاچاخچێتی بۆ ڕێکخستنی گواستنەوەی کۆچبەران بۆ یۆنان و ئیتاڵیا بە بەکارهێنانی دەیان بەلەمی بچووک.

 

تۆمەتباری دووەم خاوەنی کۆمپانیایەکی حەواڵەیە و تەمەنی 40 ساڵە و تۆمەتبارکراوە بە ئەنجامدانی مامەڵەی دارایی لە بری حەسەنزادە. 

 

تۆمەتباری سێیەم تەمەنی 30 ساڵە، بە تۆمەتی نێوەندگیری ئەو گرووپە کاری کردووە بۆ کۆکردنەوەی کۆچبەران بۆ گواستنەوە لەلایەن ئەو تۆڕە.

 

قووڵتر: هەر سێ تۆمەتبارەکە خەڵکی شاری سلێمانی بوون و لە نێوان 8 - 12ـی ئەم مانگە دەستگیرکراون.