عێراق بۆ نۆژەنکردنەوەی کێڵگەی نەوتی کەرکووک یاداشتنامەیەک واژۆ دەکات

ئاڤا نیوز 

 

عێراق یاداشتێکی لێکتێگەیشتن لەگەڵ کۆمپانیای بریتیش پیترۆلیۆم (بی پی) واژۆ دەکات بۆ نۆژەنکردنەوەی کێڵگە نەوتییەکانی کەرکووک. 

 

ڕاگەیێنراوی فەرمی: بەگوێرەی نووسینگەی ڕاگەیاندنی محەممەد شیاع سوودانی، سەرۆکوەزیرانی عێراق ڕۆژی سێشەممە لە لەندەن، بە ئامادەبوونی حەییان عەبدولغەنی، وەزیری نەوت یاداشتی لێکتێگەیشتن لەنێوان حکومەتی عێراق و کۆمپانیای بریتیش پیترۆلیۆم (بی پی) واژۆ کرا سەبارەت بە بەرنامەیەک بۆ هەڵسەنگاندنی ئەگەری گەشەپێدانی تەواوی هەر چوار کێڵگە نەوتییەکانی پارێزگای کەرکووک.

 

بۆچی گرنگە: ئامانج لە یاداشتەکە کارکردنە لەسەر ڕەوانەکردنی پڕۆژەی نۆژەنکردنەوە و پەرەپێدانی چوار کێڵگەی کۆمپانیای نەوتی باکوور لە کەرکووک بۆ کۆمپانیای "بی پی"، بەمەبەستی زیادکردنی بەرهەمهێنان و گەیشتن بە باشترین ڕێژەی بەرهەمهێنانی نەوت و گاز.

 

لەلایەکی دیکەوە: لە چەند ڕۆژی ڕابردوودا حکومەتی هەرێمی کوردستان لەبارەی مامەڵەکردن بە نەوتی کەرکووک و ناوچە جێناکۆکەکان لەلایەن بەغداوە ڕاگەیێنراوێکی بڵاوکردەوە و ڕایگەیاند: حکومەتی عێراق لە 20 ساڵی ڕابردوودا ڕیفراندۆمی لەو ناوچانە نەکردووە و چارەنووسی یەکلانەکردوونەتەوە، ئێستاش دەیەوێت نەوت و گازەکەیان تاکلایەنە بۆ خۆی ببات، ئەمەش پێشێلکردنی دەستوورە و قبووڵی ناکەین.