ئەردۆغان لەبارەی ئازادکردنی ئۆجەلان: لێخۆشبوون بۆ بکوژی منداڵ نییە

ئاڤا نیوز

ڕەجەب تەیب ئەردۆغان، سەرۆککۆماری تورکیا ئازادکردنی ئۆجەلان و دەستبەسەرکردنی لە ماڵەوە بە بانگەشەو قسەی هەڵبەستراو ناودەبات و دەڵێت، هەوڵەکان تەنیا لەپێناو " تورکیایەکی بێ تیرۆرە".

 

لێدوانی فەرمی: وەک ئامادەکارییەک بۆ کۆنگرەی هەشتەمی ئاکپارتی کە بڕیارە لە 23-02-2025 بکرێت، ئەردۆغان کۆبوونەوەیەکی داخراوی نانی بەیانی لەگەڵ پەرلەمانتارانی پارتەکەی کرد و لە کۆنگرەیەکی ڕۆژنامەوانیی داخراودا ئەمانەی گوت:

 

- لێبووردنی گشتی نییە، ئەوە دەنگۆیە و نامەوێت کەس قسەی لەسەر بکات، چونکە بڕیارێکی لەو جۆرە نییە.

 

- شتێک بەناوی دەستبەسەرکردنی ئۆجەلان لە ماڵەوە نییە، ئەو خۆیشی بەوە ڕازی نابێت، نازانم ئەو قسانە لە کوێ دێنن! "بۆ بکوژی منداڵ لێخۆشبوون نییە".

 

- لە ساڵی 2025 تیرۆر لە تورکیا کۆتایی دێت، پەکەکە دەبێت چەک دابنێت و خۆی هەڵبوەشێنێتەوە،  نەک تەنیا لە تورکیا، بەڵکو  لە عێراق و سووریاش پێویستە بێ مەرج چەکەکانیان ڕادەست بکەن.

 

 

کاریگەری و لێکەوتەکان: دوێنی ئەردۆغان لە گەڵ خێزان و کەسوکاری ئەو کەسانەدا کۆبووەوە کە لە شەڕی پەکەکە کوژراون، ئەمەش بەهۆی ئەوەی دەنگۆی ئازادکردنی عەبدوڵڵا ئۆجەلان و بەندکراوانی دیکەی پەکەکە، نیگەرانی لەلای خێزانی سەربازە کوژراوەکان دروست کردووە.

 

هۆکارە زانراوەکان: ئەردۆغان لەنێوان بەرداشی ڕێککەوتن لەگەڵ کورد لەپێناو سەرکەوتنی لە هەڵبژاردنی داهاتووی تورکیا و فشاری نەیارانی کورددا ماوەتەوە، لەلایەک پارتە ئۆپۆزیسیۆنەکان بانگەشەی "بەفیرۆچوونی خوێنی شەهیدەکانیان" دەکەن، لەلایەکی دیکەوە، ئاکپارتی بۆ زیادکردنی دەنگەکانی و کەمکردنەوەی گرژییەکان پێویستی بە ڕێککەوتنە لەگەڵ کورد.