لە دەروازەی ئیبراهیم خەلیل دەست بەسەر 21 هەزار تۆن كەلوپەل دەگیرێت

ئاڤا نیوز

 

لە ماوەی ساڵێكدا زیاتر لە 21 هەزار تۆن كەلوپەل لە دەروازەی سنووری ئیبراهیم خەلیل دەستی بەسەردا گیراوە و ڕێگە نەدراوە داخیڵی هەرێمی كوردستان بكرێت ئەوەش بەهۆی نەبوونی مەرجی تەندروستی یاخود دەرنەچوونی لە كوالێتی كۆنتڕۆڵی.

 

ڕاگەیێنراوی فەرمی: بەشی پەیوەندی و ڕاگەیاندنی بەڕێوەبەرایەتیی دەروازەی نێودەوڵەتی ئیبراهیم خەلیل ڕاگەیێنراوێكی بڵاوكردەوە و تێیدا هاتووە: لە ماوەی ساڵێكدا بڕی 21 هەزار و 461 تۆن كەرەستەی جۆراوجۆر لە تاقیگە و لیژنە پەیوەندیدارەكانی سەر دەروازەكە، پەسەند نەكراون و زۆرینەی گەڕێندراونەتەوە و بەشێكیش لەناوبراون.

 

هۆكارە زانراوەكان: ئەو كەرەستانەی دەستیان بەسەردا گیراوە و ڕێگە نەدراون داخیڵی هەرێمی كوردستان بن لەگەڵ ڕێنماییەكانی كوالێتی كۆنتڕۆڵی حكومەتی هەرێمی كوردستان نەگونجاون، زۆربەی كەلوپەلە دەست بەسەرداگیراوەكانیش دەرمان و كەلوپەلی تەندروستی و خواردن و خواردنەوە و بەرهەمەمی كشتوكاڵین، هەروەها كەرەستەی ڤێتێرنەری و بیناسازی لەنێویاندا هەن.