لە چەند کاتژمێری داهاتوو ڕێککەوتنی نێوان حەماس و ئیسرائیل ڕادەگەیێنرێت

ئاڤا نیوز

 

لە دوای خولێکی گرنگی وتووێژەکان، جیهان چاوەڕێی ڕاگەیاندنی ڕێکەوتنی نێوان حەماس و ئیسرائیل بۆ ئاگربەست لە کەرتی غەززە و ئاڵوگۆڕی زیندانییەکان دەکات و کاربەدەستانی فەلەستین و ئیسرائیلیش پێشبینی دەکەن لەچەند کاتژمێری داهاتوو ڕێککەوتنی نێوان حەماس و ئیسرائیل ڕابگەیێنرێت.

 

ئەوەی پێویستە بیزانیت: ئاژانسەکانی هەواڵ وردەکارییەکانی ڕێککەوتنە چاوەڕوانکراوەکەی نێوان حەماس و ئیسرائیلیان بڵاو کردووە کە چەند قۆناغێک لەخۆ دەگرێت:

 

قۆناغەکانی ڕێککەوتنەکە:

ڕێککەوتنەکە لە سێ قۆناغ پێکهاتووە، هەر قۆناغێک 42 ڕۆژ دەخایەنێت، بەڵام ئیسرائیل دەیەوێت لە دانوستانەکانی قۆناغی دووەمی ڕێککەوتنەکە سنوورداربکات بۆ دوو قۆناغ، بەپێی ڕەشنووسی ڕێککەوتنەکە کە دەستی ئاژانسی ئەنادۆڵ کەوتووە.

 

* قۆناغی یەکەمی ڕێککەوتنەکە کە پێی دەگوترێت "قۆناغی مرۆیی" چاوەڕوان دەکرێت 33 دەستگیرکراوی ئیسرائیلی زیندوو و مردوو ئازاد بکرێن کە ژن و بەتەمەن و نەخۆش لەخۆ دەگرێت و سوپای ئیسرائیلیش لە زۆربەی ناوچانەی کۆنترۆڵی کردوون لە غەززە دەکشێتەوە.

 

به گوێرەی ڕێککەوتننامەکه کاروانی ئازادکردنی یەکەم زیندانیانی ئیسرائیلیە، کە له قۆناغی یەکەمدا له ڕۆژی حەوتەمی ئاگربەست دەبێت و لە بەرامبەر هەر سەربازێکی ئیسرائیلی، 50 دەستگیرکراوی فەلەستینی ئازاد دەکرێن کە 30 کەسیان بە زیندانی هەتاهەتایی و 20یان بە زیندانی درێژخایەن سزا دراون.

بۆ هەر ژنێک یان بەساڵاچووێکی ئیسرائیلی، 30 دەستگیرکراوی فەلەستینی لە چین و توێژە جۆراوجۆرەکان، لەوانە مێردمنداڵ، نەخۆش و ژن ئازاد دەکرێن.

* قۆناغی دووەم کە لە ڕۆژی 16ی دەستپێکردنی رێککەوتنەکە دەست پێدەکات و تیشک دەخاتە سەر گفتوگۆکردن لەسەر ڕێکەوتنێکی گشتگیر بۆ سەرجەم زیندانییەکان لە غەززە و ئازادکردنی ئەو گەنج و سەربازانەی کە ماونەتەوە. ڕێککەوتن لەسەر قۆناغی دووەم دەبێت پێش کۆتاییهاتنی هەفتەی پێنجەمی قۆناغی یەکەمی ڕێککەوتنەکە بکرێت.

* قۆناغی سێیەم و کۆتایی، ڕێکخستن و پلانی درێژخایەن بۆ ئاوەدانکردنەوەی کەرتی غەززە دەگرێتەوە.

 

بڵاوکراوەی فەرمی: ئەم ئێوارەیە کەناڵی 13ی ئیسرائیلی بڵاویکردەوە، بنیامین ناتانیاهۆ، سەرۆکوەزیرانی ئیسرائیل ئێوارەی چوارشەممە گفتوگۆی بەپەلە لەگەڵ شاندی ئیسرائیل لە قەتەر و هاوکات سەرۆکی دەزگا ئەمنییەکان دەکات.

 

لەلایەکی دیکە: کەناڵی 12ی ئیسرائیلیش بڵاویکردەوە کابینەی جەنگیی ئیسرائیل ڕۆژی پێنجشەممە کۆبوونەوەیەک ئەنجام دەدات بۆ پەسەندکردنی ڕێککەوتنەکە، لەکاتێکدا پێشبینی دەکرێت ڕێککەوتنەکە یەکشەممەی داهاتوو جێبەجێ بکرێت.

 

لێدوانی فەرمی: بەرپرسێکی باڵای ئیسرائیلی بە ماڵپەڕی هەواڵی والا-ی ئیسرائیلی ڕاگەیاند، پێشکەوتن لە دانوستانەکانی دەوحە لەسەر ئاگربەست و ئاڵوگۆڕی بارمتە و زیندانییەکان بەدی هاتووە.

 

بۆچوونی لایەنی بەرامبەر: سەرچاوەیەکی فەلەستینیش بە کەناڵی کان-ی ئیسرائیلی ڕاگەیاندووە، لە گفتوگۆکانی قەتەر بەرەوپێشچوون بەدیهاتووە و پێدەچێت تا ڕۆژی پێنجشەممە ڕێککەوتنەکە واژۆ بکرێت و لە ماوەی ڕۆژێک یان دوو ڕۆژیشدا بچێتە بواری جێبەجێکردنەوە.

 

لەلایەکی دیکەوە: ماڵپەڕی تایمز ئۆف ئیسرائیل بڵاویکردووەتەوە، لە دوا خولەکەکاندا حەماس داواکارییەکی نوێی زیاد کردووە، حەماس نارازییە لەوەی لە قۆناغی یەکەمی ئاگربەستدا ڕێڕەوی فیلادلفیا کە دەکەوێتە سنووری نێوان میسر و غەززە لەژێر دەستی ئیسرائیل بمێنێتەوە، ئیسرائیلیش سوورە هەر لە دەستی خۆیدا بێت.