بەریتانیا و عێراق لەبارەی قاچاخچێتی و کۆچبەران ڕێککەوتن

ئاڤا نیوز

 

ئیڤێت کوپەر، وەزیری ناوخۆی بەریتانیا لە میانی سەردانێکیدا بۆ هەرێمی کوردستان و عێراق ژمارەیەک ڕێککەوتنی تایبەت کاری بە قاچاغچێتی بە مرۆڤ و ئاسایشی سنوورەکان واژوو کرد.

 

وێنە گەورەکە: ڕۆژانە قاچاغچییەکان لە ڕێگەی سنوورە ئاوییەکانی فەرەنسا دەیان کۆچبەر دەبەنە بەریتانیا و ئەو وڵاتەش دەیەوێت ڕێگری لە لێشاوی هاتنی کۆچبەران بۆ وڵاتەکەی بگرێت و ڕێککەوتنی لەگەڵ هەرێمی کوردستان و عێراق بۆ ئەو مەبەستە واژوو کردووە.

 

ئەوەی پێویستە بیزانیت: بەندەکانی ڕێککەوتنەکە کە لەنێوان عێراق و بەریتانیا سەبارەت بە قاچاخچێتی و دۆسیەی کۆچبەران واژۆکراوە بەمشێوەیە: 

-  بەریتانیا و عێراق پابەندن بە هەماهەنگیکردن بۆ ڕووبەڕووبوونەوەی قاچاغچێتی و بەهێزکردنی ئاسایشی سنوورەکان.
- بەریتانیا پابەندە تاوەکو 300 هەزار پاوەند بداتە عێراق بۆ ڕاهێنانی جێبەجێکردنی یاساکان لە بواری ئاسایشی سنوورەکان، هاوکات ڕاهێنانەکە لەسەر تاوانی کۆچبەری ڕێکخراو و ماددە هۆشبەرەکان دەبێت.
- حکومەتی بەریتانیا 200 هەزار پاوەند دادەتە حکومەتی هەرێمی کوردستان بۆ پشتگیریکردن لە پڕۆژەکانی هەرێم بۆ ڕووبەڕووبوونەوەی کۆچی نایاسایی و ئاسایشی سنوورەکان.
-   بەریتانیا و عێراق هاوکاریی یەکدی دەکەن بۆ ئەنجامدانی ئۆپەراسیۆن دژ بە تاوانە ڕێکخراوەکان، لەوانە تاوانی کۆچبەری ڕێکخراو، ماددە هۆشبەرەکان، کۆیلایەتی، بازرگانیکردن بە مرۆڤ و مامەڵەی دارایی نایاسایی.
-   بەریتانیا و عێراق ڕێککەوتن لەسەر گەراندنەوەی ئەو کەسانی کە مافی مانەوەیان لە بەریتانیا نییە.

 

زانیاریی زیاتر: ئەو خاڵانەی ڕێککەوتنی لەسەر کراوە پابەندبوونی بەریتانیا و حکومەتی هەرێمی کوردستان و عێراقە بە یاسای نێودەوڵەتی و مرۆیی، هەروەها پابەندبوونیان بە ستاندارەکانی مافی مرۆڤ لەسەر ئاستی نێودەوڵەتی.