سوننەکان نیگەرانن و داوای کاراکردنی ڕێککەوتنە سیاسییەکان دەکەن

ئاڤا نیوز

هاوپەیمانی سەرکردایەتی یەکگرتووی سوننە لە عێراق بەیاننامەیەکی بڵاوکردەوە و داوای کاراکردنی ئەو ڕێککەوتنە سیاسییە دەکات کە بووە بنەمای پێکهێنانی حکومەتی ئێستای عێراق.

ڕاگەیێنراوی فەرمی: لە بەیاننامەکەیدا، هاوپەیمانی سەرکردایەتیی یەکگرتووی سوننە داوا لە هاوپەیمانی ئیدارەی دەوڵەت دەکات پەلە بکەن بۆ جێبەجێکردنی چەند خاڵێکی سەرەکی ڕێککەوتنە سیاسییەکەی نێوان لایەنەکانی حکومەتی ئێستای عێراق کە بریتین لە:

- پەسەندکردنی یاسای لێبوردنی گشتی. 

- گەڕانەوەی ئاوارەکان بۆ گوند و ناوچەکانی خۆیان، بەتایبەتی ئاوارەکانی جورف سەخەڕ و عۆجە
هەڵوەشاندنەوەی دەستەی لێپرسینەوە و دادپەروەری. 

- هاوسەنگی لە بەڕێوەبردنی دامودەزگاکانی دەوڵەتدا بە شێوەیەک کە مافەکانی پێکهاتەی سوننە مسۆگەر بکات.

- کشانەوەی سەرجەم هێزە سەربازییەکان لە شارە سوننەنشینەکان و ڕادەستکردنی دۆسییەی ئەمنی بە وەزارەتی ناوخۆ.

باکگراوند: چەند ڕۆژێک لەمەوبەر هەریەکە لە مەحموود مەشهەدانی، سەرۆکی پەرلەمانی عێراق و خەمیس خەنجەر، سەرۆکی هاوپەیمانی سیادە و موسەننا سامەڕائی، سەرۆکی هاوپەیمانی عەزم و ئەحمەد جبوری، سەرۆکی حیزبی جەماوەر و زیاد جەنابی، سەرۆکی فراکسیۆنی موبادەرە لە بەغدا کۆبوونەوە و پێکهێنانی هاوپەیمانی سەرکردایەتیی یەکگرتووی سوننەیان ڕاگەیاند.