بەریتانیا ئەرشیڤی تاوانەكانی ڕژێمی بەعس ڕادەستی سوودانی دەكاتەوە

ئاڤا نیوز

لەچوارچێوەی سەردانەكەیدا بۆ بەریتانیا، نووسینگەی بەریتانیای ڕێكخراوی مافەكانی مرۆڤ ژمارەیەك بەڵگەنامەی ئەرشیڤی پەیوەست بە تاوانەكانی ڕژێمی پێشووی بەعس، ڕادەستی سەرۆكوەزیرانی عێراق كردەوە.

وێنە گەورەكە: لە شاری لەندەن، ساحب جەواد، باڵیۆزی ئاشتی جیهانی و ئەمینداری گشتیی ڕێکخراوی مافەکانی مرۆڤ بە نوێنەرایەتیی شێخ دكتۆر عەباس قورەیشی، ئەرشیڤی ڕێكخراوەكەی بە سەنتەری عێراق بۆ بەدۆكیۆمێنتكردنی تاوانەكانی توندڕەویی بەخشی كە ژمارەیەك بەڵگەنامەی مێژوویی تاوانەكانی ڕژێمی بەعسی لەخۆگرتبوو، ڕێورەسمی پرۆتۆكۆڵی ڕادەستكردنەوەی بەڵگەنامەكانیش بە سەرپەرشتی ڕاستەوخۆی سەرۆكوەزیرانی عێراق واژۆكرا.

ڕاگەیێنراوی فەرمی: نووسینگەی ڕاگەیاندنی سەرۆكی ئەنجوومەنی وەزیرانی عێراق بڵاوی كردووەتەوە، محەممەد شیاع سوودانی، سەرۆكوەزیرانی عێراق لە شوێنی مانەوەی خۆی لە لەندەن سەرپەرشتی ڕادەستكردنەوەی بەشێك لە ئەرشیڤی ڕێكخراوی مافی مرۆڤی كرد كە تاوانەكانی ڕژێمی بەعسی لەخۆگرتووە، بەمەبەستی بە دۆكیۆمێنتكردنی مێژووی ڕەشی حكومڕانی بەعس لە عێراق و ئەو كۆمەڵكوژی و تاوانە قێزەونانەی بەرامبەر گەلانی عێراق ئەنجامی داوە.

بۆچی گرنگە:

- هەبوونی بەڵگەنامە و بەدۆكیۆمێنتكردن و كاریگەرییەكانی لەسەر مامەڵەكردن لەگەڵ زانیاری و بەڵگەنامەكانی تاوانەكانی ڕژێمی پێشووی بەعس، بۆ چەسپاندنی لە بیرەوەریی نەوەكان گرنگە.

- سەرچاوەیەكی باوەڕپێكراو و پشتڕاستكراو دەبێت بۆ توێژەران و هەموو ئەوانەی لە پرسەكانی مافی مرۆڤ دەكۆڵنەوە یاخود لە بواری توێژینەوە مێژووییەكان كاردەكەن.

- ڕۆڵێكی گرنگی دەبێت لە گەیاندنی مەینەتییەكانی گەلانی عێراق بە درێژایی مێژوو بەدەست ڕژێمە داپلۆسێنەر و ستەمكارەكان.