موسەنا ئەمین: کێشەی کورد لە ڕۆژئاوای کوردستان کێشەی ئێمەیە

ئاڤا نیوز

 

کۆبوونەوەیەکی مێژوویی لەبارەی داهاتووی کورد لە ڕۆژئاوای کوردستان و سووریا لە هەولێر کرا و ئەندامێکی سەرکردایەتیی یەکگرتووش لێکنزیکبوونەوەی لایەنە کوردییەکان بە پێویست دەزانێت.

 

چیرۆکی سەرەکی: ڕۆژی پێنجشەممە 16-1-2025، کۆبوونەوەیەکی گرنگ لە نێوان سەرۆک بارزانی و مەزڵووم عەبدی، فەرماندەی گشتیی هێزەکانی سووریای دیموکرات کرا، کە چوارچێوەی گشتیی مامەڵەکردنی لایەنە کوردییەکان لەگەڵ بارودۆخی تازەی سووریا و چۆنیەتیی گرتنەبەری هەڵوێستێکی هاوبەشی لایەنە کوردییەکانی سووریا تاوتوێ کراون.

 

لێدوانی فەرمی: موسەنا ئەمین، ئەندامی سەرکردایەتیی یەکگرتوو و ئەندامی ئەنجوومەنی نوێنەرانی عێراق بە ئاڤا میدیای ڕاگەیاند: دەبێت کێشەی کورد لە ڕۆژئاوای کوردستان و سووریا دا لەسەر بنەمای دیموکراسی، ڕێزگرتن، ماف، شوناس و خۆبەرێوەبردن چارەسەر بکرێت، هاوکات کێشەی کورد لە ڕۆژئاوای کوردستان کێشەی ئێمەشە.

 

موسەنا ئەمین باسی لەوەشکرد، نزیکبوونەوەی لایەنە کوردستانییەکان لە یەکتر هەنگاوێکی گرنگە و گفتوگۆکان بۆ کەمکردنەوەی جیاوازییەکان پێویستە.

 

لەلایەکی دیکەوە: فاتیح سەنگاوی، ئەندامی پەرلەمانی کوردستان لە فراکسیۆنی یەکگرتوو بە ئاڤا میدیای ڕاگەیاند: هەر هەوڵ و ڕێوشوێنێک لەلایەن هەرکەسێکەوە بێت و خزمەت بە دۆزی کورد بکات لە ڕۆژئاوای کوردستان و سووریا دا، کە بتوانێت سەقامگیری و ئارامی بۆ کورد دابین بکات، ئەوا بە گرنگی دەبینین.

 

ئەوەشی گوت، هەر ڕێکار و هەوڵێک دۆزی کورد لە ڕۆژئاوای کوردستان بباتە پێشەوە، بە ئاڕاستەیەکی دروست و تەندروستی دەزانین.