بڕیارێکی حکومەتی عێراق دەبێتە هۆی پەکخستنی بازاڕی ‌کڕین و فرۆشتنی خانووبەرە

ئاڤا نیوز

 

بڕیارێکی حکومەتی عێراق لەبارەی فرۆشتنی خانووبەرە لەڕێگەی بانکەوە، جوڵەی کڕین و فرۆشتنی لە عێراق و بەغدای پایتەخت بە تایبەت پەکخستووە.

 

چیرۆکی سەرەکی: بانکی ناوەندیی عێراق لە نووسراوێکی فەرمیدا کە ئاڕاستەی بەشی تۆماری خانووبەرەی کردووە، هەموو مامەڵەیەکی خانووبەرە بە پارەی کاش قەدەغە دەکات کە بەهاکەی لەسەروو 100 ملیۆن دینارەوە بێت، بەپێی میکانیزم و ڕێنماییە نوێیەکەی ئەو بانکە، پێویستە ئەو خانووبەرانەی یاساکە دیانگرێتەوە تەنیا لە ڕێگەی بانکە عێراقییەکانەوە بفرۆشرێن.

 

لێدوانی فەرمی: ناسرکەنانی، پسپۆڕی کاروباری ئابووری بەئاڤا میدیا گوت: هەرچەندە بڕیارەکەی بانکی ناوەندی عێراق سەبارەت بە میکانیزمی فرۆشتنی خانووبەرە زۆر درەنگ هات، بەڵام کاریگەریی ئەرێنی لەسەر سپیکردنەوەی پارە دەبێت، چونکە زۆربەی پارەی گەندەڵی بۆ کڕینی خانووبەرە دەگوازرێتەوە.
 
باسی لەوەشکرد، ئەو میکانیزمە نوێیەی بانکی ناوەندی نابێتە هۆی بەرزبوونەوەی نرخی خانووبەرە، بەپێچەوانەوە ڕەنگە ببێتە هۆی دابەزینی، ئەگەر بریارەکەش وەک خۆی جێبەجێ بکرێت لە داهاتوویەکی نزیکدا کاریگەرییەکانی دەردەکەوێت. 

 

ئەمەش بزانە: لەدوای ساڵی 2005 ـەوە نرخی خانووبەرە لە عێراق بەشێوەیەکی بەرچاو زیادی کردووە، لە هەندێک شوێنی بەغدا، نرخی یەک مەتر چوارگۆشە زەوی گەیشتووەتە سێ هەزار دۆلار.