نەوەی نوێ لەبارەی بەشداریکردن لە حکومەت بڕیاری دا

ئاڤا نیوز

سەرۆکی جوڵانەوەی نەوەی نوێ لە کۆنفرانسێکی ڕۆژنامەوانیدا ڕایدەگەیێنێت، "بەشداری لە کابینەی داهاتووی حکومەتی هەرێمی کوردستان ناکەین ئەگەر دەسەڵاتمان نەبێت. هاوکات وتیشی ئەگەر پارتی و یەکێتی لەبارەی پێکهێنانی حکومەت نەگەیشتنە ڕێککەوتن، ئێمە بەو مەرجانەی کە هەمانە بەشداری حکومەت دەکەین".

وێنە گەورەکە: بەگوێرەی ئەنجامی خولی شەشەمی پەرلەمانی کوردستان، نەوەی نوێ سێیەم براوەی هەڵبژاردنە و 15 کورسی بەدەستهێناوە، لەماوەی ڕابردوو ئامادەیی خۆیان بۆ بەشداریکردن لە کابینەی دەیەمی حکومەتی هەرێمی کوردستان بە کۆمەڵێک مەرج خستەڕوو، لەوانە پێدانی پۆستی سەرۆکی حکومەت و سەرۆکی هەرێمی کوردستان.

لێدوانی فەرمی: شاسوار عەبدولواحید، سەرۆکی جووڵانەوەی نەوێ نوێ لەبارەی بەشداریکردن لە حکومەت ڕایگەیاند:

- لە کۆبوونەوەی نێوان شاندی نەوەی نوێ و پارتیدا، پارتی ئامادەیی نیشانداوە  شەش وەزارەتمان پێبدەن لەگەڵ 30 بەڕێوەبەری گشتی و 20 بریکاری وەزیر، بەڵام قسەی ئێمە ئەوەیە بەهیچ شێوەیەک بەشداری حکومەت ناکەین ئەگەر دەسەڵاتمان نەبێت، واتە بەم سیغەیەی ئێستا وەکو ئۆپۆزیسیۆن دەمێنینەوە.

- ئەگەر تاوەکو ئەم چوارشەممەیە پەرلەمانی کوردستان کۆنەبێتەوە، محەممەد سلێمانی، سەرۆکی کاتی پەرلەمان دەست لەکار دەکێشێتەوە.

 

زانیاریی زیاتر: بە گوتەی سەرۆکی جوڵانەوەی نەوەی نوێ، ئەگەر لەداهاتوو پارتی و یەكێتی نەگەیشتنە ڕێککەوتن لەسەر پێکهێنانی حکومەت، نەوەی نوێ بەشداری لە کابینەی داهاتوو دەکات، بەڵام بەو مەرجەی سەرجەم داواکارییەکانی نەوەی نوێ جێبەجێ بکرێت.