هاوپەیمانی یەکگرتووی سووننەکان وەڵامی هاوپەیمانی ئیدارەی دەوڵەت دەداتەوە

ئاڤا نیوز

هاوپەیمانی سەرکردایەتیی یەکگرتووی سووننەکان پەیوەست بە جێبەجێکردنی ڕێککەوتنی سیاسی پێکهێنانی حکومەتی عێراق و مافی پارێزگا ڕزگارکراوەکانی ژێر دەستی داعش وەڵامی هاوپەیمانی ئیدارەی دەوڵەتی دایەوە، داوا دەکات یاسای لێبووردنی گشتی پەسەندبکرێت و بە سەربازگەکردنی شارەکانیش کۆتایی پێبهێنرێت.

ئەوەی پێویستە بیزانیت: هاوپەیمانی سەرکردایەتیی یەکگرتووی سووننەکان پێشتر داوایکردبوو خاڵەکانی ڕێککەوتنی سیاسی پێکهێنانی حکومەت خێرا جێبەجێ بکرێن، دوێنێش هاوپەیمانیی ئیدارەی دەوڵەت لە وەڵامی سوننەکاندا ڕایگەیاند، "داواکارییەکانتان لە ڕێگایە بۆ جێبەجێکردن بەپێی یاسا و دەستوور".

ڕاگەیێنراوی فەرمی: لە وەڵامی ڕاگەیێنراوەکەی هاوپەیمانی ئیدارەی دەوڵەتدا، ئەمڕۆ دووبارە هاوپەیمانی سەرکردایەتیی یەکگرتووی سووننەکان ڕوونکردنەوەیەکی بڵاوکردەوە و داوایکرد کۆبوونەوەی داهاتووی هاوپەیمانێتییەکە لەسەر ڕێککەوتنی سیاسی پێکهێنانی حکومەت بێت، تا جێبەجێکردنی ڕێککەوتنەکە وادەیەکی بۆ دابنرێت و بنەمای حکومڕانی چاک و حکومەتی هاوپەیمانی تێدا بەدیبهێنرێت.

داواکارییەکانی هاوپەیمانی سەرکردایەتی یەکگرتووی سووننەکان:

- هەمواری یاسای لێبووردنی گشتی و دووبارە لێکۆڵینەوە لەوانەی بەوتەی شاهێدحاڵی نهێنی سزادراون.

- گەڕانەوەی ئاوارەکان بۆ شوێنی خۆیان، بەتایبەتیش بۆ ناوچەکانی جەرف سەخر و عۆجە و قەرەبووکردنەوەیان.

- ئاشکراکردنی چارەنووسی بێسەروشوێنکراوان و قەرەبووکردنەوەی کەسوکاریان.

- هەڵوەشاندنەوەی دەستەی لێپرسینەوە و دادپەروەریی.

- کۆتاییهێنان بە سەربازگەکردنی شارەکان و ڕادەستکردنی ئاسایشی شارەکان بە وەزارەتی ناوخۆ.

- داخستنی نووسینگەی ئابووری سەر بە گرووپە سیاسیی و چەکدارییەکان لە پارێزگا ڕزگارکراوەکان.

- بەدیهێنانی هاوسەنگی پێکهاتەکان لە دامەزراوە ئیداریی و سەربازییەکانی دەوڵەتدا.

- کۆتاییهێنان بە وردبینی ئەمنیی لە پارێزگا ڕزگارکراوەکان و قەرەبووکردنەوەی هەموو ئەو خێزان و کۆمپانیا و کارگانەی لە ئەنجامی پرۆسە سەربازییەکانی دژی داعش زیانمەند بوون.