نەتەوەیەکگرتووەکان: 200 هەزار هاووڵاتی سووری گەڕاونەتەوە وڵاتەکەیان

ئاڤا نیوز

 

دوای ڕووخانی ڕژێمی بەشار ئەسەد لە سووریا، نەتەوەیەکگرتووەکان نوێترین ئاماری گەڕانەوەی هاووڵاتیانی ئەو وڵاتە بۆ سووریا دەخاتەڕوو کە ژمارەیان زیاتر لە 200 هەزار کەسە.

 

ڕاگەیێنراوی فەرمی: ڕێکخراوی نەتەوەیەکگرتووەکان ڕایگەیاند، لە سەرەتای مانگی 12 ساڵی 2024 تاوەکو ئێستا، زیاتر لە 200 هەزار پەنابەری سووری گەڕاونەتەوە وڵاتەکەیان. 

 

لەلایەکی دیکە: فیلیپۆ گراندی، کۆمیسیاری باڵای پەنابەرانی نەتەوەیەکگرتووەکان لە ئێکس ڕایگەیاندووە، لە کاتێکی نزیکدا سەردانی سووریا و چەند وڵاتێکی دراوسێی دەکات.

 

زانیاریی زیاتر: لە سەرەتای سەرهەڵدانی شەڕی ناوخۆ لە سووریا لە ساڵی 2011، ملیۆنان هاووڵاتی سووری ناچاربوون وڵاتەکەیان جێبهێڵن و ڕوو لە وڵاتانی دراوسێی  وەک لوبنان و تورکیا بکەن.

 

باکگراوند: دوای 11 ڕۆژ لە ئۆپەراسیۆنی سەربازیی، گرووپە چەکدارییەکانی ئۆپۆزیسیۆنی سووریا لە 8-12-2024 توانییان دەست بەسەر دیمەشقی پایتەختی وڵاتەکە بگرن، دەسەڵاتێکی نوێ بۆ سووریا دابمەزرێنن کە لەلایەن ئەحمە شەرعـەوە سەرکردایەتیی دەکرێت.