هەمواری یاسای بودجە لە لیژنەی دارایی دەنگی لەسەر درا

ئاڤا نیوز

کۆبوونەوەی لیژنەی دارایی لە ئەنجوومەنی نوێنەران کۆتاییهات و دەنگ لەسەر هەمواری یاسای بودجە درا، ئەوەی پەیوەستە بە هەناردەکردنەوەی نەوتی هەرێمی کوردستان.

بۆچی گرنگە: بەگوێرەی هەمواری یاسای بودجە، تێچووی بەرهەمهێنان و گواستنەوەی نەوتی کوردستان لە 6 دۆلارەوە بۆ 16 دۆلار زیاد دەکرێت، لەسەر ئەو بنەمایەش بڕیارە هەناردەی نەوتی هەرێمی کوردستان ڕاستەوخۆ دەستپێبکاتەوە.

چیرۆکی سەرەکی: لیژنەی دارایی بۆ هەمواری بڕگەی (ج) ماددەی 12 لە یاسای بودجە، کۆبووەوە بۆ ئەوەی پێش دەستپێکردنی کۆبوونەوە دەنگ لەسەر هەمواری ئەم ماددەیە بدات ئینجا ببرێتە نێو کۆبوونەوەی پەرلەمان.

زانیاریی پەیامنێر: دەروون مەلا ناجی، پەیامنێری ئاڤا لەئەنجوومەنی نوێنەرانی عێراق ڕایگەیاند: کۆبوونەوەی لیژنەی دارایی ئەنجوومەنی نوێنەران کۆتاییهات و دەنگدرا لەسەر ئەو پرۆژەیەی تایبەتە بە هەمواری یاسای بودجە کە لەحکومەتەوە هاتووە پەسەند بکرێت بەبێ دەستکاری کردن.

ئەوەی ئێستا ڕوودەدات: ئەنجوومەنی نوێنەرانی عێراق بە سەرۆکایەتی مەحموود مەشهەدانی و بە ئامادەبوونی 167 ئەندام پەرلەمان لە کۆبوونەوەدایە، بڕیارە لەو کۆبوونەوەیە دەنگ لەسەر پێنج پرۆژە یاساو خوێندنەوەی یەکەم بۆ سێ پرۆژە یاسای دیکە بکرێت، یەکێک لەو پرۆژەیاسانەی کە بڕیارە دەنگی لەسەر بدرێت "هەمواری پرۆژەیاسای بودجە"یە.